Gazetari hulumtues nga Shqipëria, Artan Hoxha ka folur për rastin e konfiskimit të sasisë së madhe të drogës në Lipjan.
Hoxha në “Debat Plus” thotë se droga e konfiskuar në Lipjan është e pastërtisë gati sa kristali.
“Kjo drogë e kalon pastërtinë e 92%, që është ndër pastërtitë më të mëdha të kokainës. Nuk do të ishte e mundur që ajo sasi të hidhej në treg ashtu. Pra nëse janë konfiskuar 400 kg kokainë të tillë, në treg do të hidhej trefishi i saj”, tha ai, përcjell Telegrafi.
“Kjo pastërti e kokainës i lejon trafikantët ta zbusin drogën dhe ta bëjnë të absorbueshme për klientët, pasi pastërtia aq e madhe rrezikon jetën e përdoruesve të saj”.
Gazetari hulumtues megjithatë thotë se ky duhet të jetë një alarm për autoritetet e Kosovës pasi Kosova po kthehet në bazë operacionale për trafikantët.
“Për fat të keq tashmë është provuar se territori i Kosovës po kthehet në një bazë operacionale të grupeve kriminale që merren me narkotrafikun”.
Hoxha thotë se kjo sasi e drogës nuk ishte e destinuar për tregun e Kosovës e as për atë të Shqipërisë.
“Kjo drogë ishte destinuar për treguan e pasur të Bashkimit Evropian”.
Hoxha thotë se dyshimet i ka pasur që droga do të dërgohej në Ferizaj pasi sipas tij ky vend është pikë strategjike ky kryqëzohen shumë rrugë të Kosovës.
Gazetari hulumtues thotë se edhe në baze të ambalazhimit të ndryshëm kuptohet se droga ishte destinuar për disa organizata.
“Që nga paketimi në Brazil, droga ishte destinuar për organizata të ndryshme”.
Hoxha dyshon se droga ishte destinuar për tregun gjerman pasi sipas tij atje ka grupe nga Kosova që merren me trafikimin e drogës.
Hulumtuesi thotë se trafikantët nga Amerika Latine sipas të gjitha gjasave edhe më parë e kanë testuar këtë rrugë të trafikimit të drogës.
“Është në praktikën e organizatave kriminale që në fillim ata testojnë sasi shumë më të ulëta të drogës. Pra në fillim ata kanë testuar sasi më të vogla, më pas kanë shkuar në sasi pak më të mëdha, për të ardhur deri te ajo që është konfiskuara sot. Trafikantët kanë fituar siguri se ky shteg është sigurt”, tregon ndër të tjera Artan Hoxha.
