Në gazetën gjermane “Der Freitag” është botuar një artikull në të cilin raportohet për Propozimin Evropian dhe pengesat e tij.
Artikulli në fjalë është shkruar nga Norbert Mappes-Niediek dhe tematizon çështjen e pengesave për arritjen e një marrëveshjeje mes Kosovës dhe Serbisë.
“Serbia dhe Kosova ishin përsëri në prag të luftës dy muaj më parë, por duan të kenë “marrëdhënie të mira fqinjësore” në të ardhmen,” – shkruhet në nisje të këtij shkrimi.
Aty shkruhet se ajo që BE-ja e festoi kohët e fundit si “përparim” u bë sërish shpejt një pikëpyetje.
“Dikush mund të mendojë se regresione (prapakthime) të tilla janë normale mes negociatash për një marrëveshje për t’i dhënë fund një lufte të ftohtë 30-vjeçare… vetëm se shanset për një marrëveshje nuk janë të mira,” – shkruan Mappes-Niedek.
Autori e quan thirrjen e kryeministrit Kurti për “një shoqëri civile të përbërë nga individë” si një demagogji meqë një gjë e tillë – siç pretendoi ai gjithmonë – nuk funksionon askund në shtetet e ish-Jugosllavisë.
Më poshtë, shkruhet edhe se si BE-ja e kërkon me urgjencë marrëveshjen, dhe nëse do të ishte e nevojshme “evropianët mund t’i impononin zgjidhje Kosovës”.
“Nëse Kurti do të kundërshtonte perëndimin, njerëzit e tij zor se do ta ndiqnin pas”.
Por, në anën tjetër autori e sheh të pafuqishme BE-në sa i përket Serbisë.
“Nëse do të reduktonin investimet dhe do të bllokonin ndihmën e para-anëtarësimit në shkallë të gjerë, Moska me siguri do të ishte e lumtur që të ndërhynte – në këmbim të një baze ushtarake?”, thotë ai.
Në diskursin e regjimit të Vuçiqit në Serbi, vlen të kujtojmë, se pikërisht mundësia e humbjes së investimeve të jashtme direkte është pasoja e pritur për një refuzim të mundshëm të propozimit.
