Shefi i Grupit Parlament të Lidhjes Demokratike të Kosovës, Arben Gashi, ka bërë me dije se kjo parti nuk do të përkrahë miratimin e marrëveshjeve ndërkombëtare pa zhbllokimin e të hyrave vetanake për komunat.
Ai ka bërë me dije se kjo parti nuk do të lëvizë nga qëndrimi as sot ku po diskutohet një marrëveshje ndërkombëtare, e cila ka të bëj me fushën e arsimit.
Shefja e Grupit Parlamentar të Lëvizjës Vetëvendosje, Mimoza Kusari-Lila, ka ftuar LDK-në që të sjell edhe një amandament në Kuvend për zhbllokimin e këtyre mjeteve të cilin do ta përkrah VV-ja.
“Ne si grup parlamentar kemi mbështetur amendamentin e LDK-së kur është propozuar në lexim të dytë të buxhetit, andaj njëjtë do e mbështesim kërkesën e tyre nëse ata bëjnë për Ministrinë e Financave që të sjell buxhetin, gjegjësisht plotësim ndryshimin në amandametin e propozuar në mënyrë që të hiqet kufizimi ligjor që aktualisht e ka thesari për ekzekutimin e mëtutjeshëm të këtyre mjeteve”, ka thënë Kusari-Lila.
Mirëpo, deputeti Gashi ka thënë se ligji është në rregull.
“Për neve është e qartë. Ligji është në rregull. Thjesht nuk po do me e zbatu”, ka thënë Gashi. “Ne nuk kemi çka me propozu. Ne presim që ministri me i kry zotimet”.