Shefki Kuqi kishte deklaruar disa javë më parë në emisionin sportiv “Favorit” në T7 se kishte dëshirë të luante për Kombëtaren shqiptare, por që Federata Shqiptare e Futbollit (FSHF) në ato vite kishte kërkuar para nga ai, duke i përmendur 100-200 mijë euro, për ta veshur fanellën e Kombëtares shqiptare.
Pas kësaj deklarate, FSHF-ja ka njoftuar se e ka paditur ish-futbollistin e njohur kosovar, i cili gjatë karrierës e ka përfaqësuar Finlandën, ndërsa kishte luajtur edhe në Premierligë.
Shtëpia e futbollit shqiptar njofton se padinë e ka bërë në Gjykatën Themelore të Prishtinës, e cila e ka pranuar atë.
“Federata Shqiptare e Futbollit ka ndërmarrë hapat ligjor duke paditur për shpifje ish-futbollistin Shefki Kuqi, i cili në një deklaratë publike në televizionin T7, gjatë emisionit “Favoriti i Botërorit” ka deklaruar se në fundvitet 90’ i janë kërkuar para për tu pajisur me pashaportë shqiptare dhe përfaqësuar Kombëtaren shqiptare. Padia e FSHF ndaj Shefki Kuqi është pranuar nga Gjykata Themelore në Prishtinë dhe është regjistruar me numër C.nr. 119/22”, shkruan FSHF-ja.
Deklaratën e Kuqit mund ta shihni në videon e mëposhtme.
