Grupi punues për shqyrtimin e Projektligjit për Kontrollin e Integritetit të Pozitave të caktuara në Sistemin e Drejtësisë është formuar sot nga Komisioni Ad-hoc.
Në këtë grup punues, do të jenë përbërja e njëjtë me atë që ka qenë për analizimin e amendamenteve kushtetuese.
Deputeti i Lidhjes Demokratike të Kosovës njëherësh kryetar i Komisionit, Kujtim Shala, ka thënë se në fillim të këtij muaji Ministria e Drejtësisë iu kanë dorëzuar këtë projektligj të harmonizuar edhe me draf-amendamentet kushtetuese por edhe me vlerësimet e Venecias.
Ai ka thënë se grupi punues do të analizojë se Projektligji për Kontrollin e Integritetit të Pozitave të caktuara në Sistemin e Drejtësisë a është draft i konsoliduar për t’u proceduar më tutje.
“Pas pranimit nga ana e Gjykatës Kushtetuese të draf-amendamenteve, Gjykata ka kërkuar nga Kuvendi që deri më 22 mars 2023 t’ju dërgohen edhe disa dokumente të punës së Komisionit ad-hoc. Ai grup punues i cili është marr me propozim-amendamentet kushtetuese do të mund të merret edhe me këtë projektligj”, ka thënë ai.
Ndërsa deputeti i Lëvizjes Vetëvendosje, Adnan Rrustemi u shpreh se ekziston mundësia që të kërkohet shtyrja e mandatit të Komisionit Ad-hoc për Zhvillimin e Procesit të Vlerësimit Kalimtar.
“E gjitha puna e këtij Komisioni varet nga përgjigja e Gjykatës Kushtetuese”, tha ai.
Rrustemi tha se mund të shtrohet nevoja që të zgjatet mandati i këtij komisioni “ad-hoc”, kjo nëse sipas tij, mund të ketë vonesa nga Gjykata Kushtetuese në shqyrtimin e amendamenteve kushtetuese.
Ndryshe, Komisioni “ad- hoc” për Zhvillimin e Procesit të Vlerësimit Kalimtar me 24 shkurt 2023, ka miratuar amandamentet Kushtetuese për procesin e Vettingut.
Ndërsa, me 2 mars 2023, Kryetar i i Kuvendit të Kosovës, Glauk Konjufca kishte njoftuar, se i ka përcjellur në Gjykatën Kushtetuese amendamentet kushtetuese lidhur me vetingun në sistemin e drejtësisë.