Kryeministri Albin Kurti është takuar sot me përfaqësuesin e zgjedhur në Kuvend të komunitetit boshnjak, Rasim Demiri, që vjen nga Koalicioni Vakat.
Në njoftimin e lëshuar nga Qeveria thuhet se temë qendrore e takimit ishte rëndësia dhe interesi i përbashkët për formimin e institucioneve të legjislaturës së dalë nga zgjedhjet e 9 shkurtit.
“Me këtë rast kryeministri Kurti vlerësoi gatishmërinë e z. Demiri dhe Koalicionit Vakat për të vazhduar bashkëpunimin”, thuhet në njoftim.
Ndër tjera, në këtë takim u bisedua edhe për përfitimet që patën qytetarët e Bosnje Hercegovinës pas mundësimit të udhëtimit në Kosovë me letërnjoftime nga 1 janari i këtij viti.
