Qeveria e Kosovës ka shpenzuar gati gjithë shumën e ndarë të fondit rezervë nga buxheti i këtij viti.
Nga rreth 4.8 milionë euro sa janë ndarë si rezerva shtetërore në bazë të Ligjit Vjetor të Buxhetit për këtë vit, deri më tani janë shpenzuar mbi 4,7 milionë euro, ka thënë , Muharrem Shahini, zëdhënës në Ministrinë e Financave, duke shtuar se mjete të pashpenzuara kanë mbetur vetëm 84 mijë euro.
Nga kjo vlerë, një milion euro janë ndarë për Operatorin e Sistemit të Transmisionit të Tregut të Energjisë Elektrike të Kosovës (KOSTT) për mbulimin e shpenzimeve të furnizimit me energji elektrike të katër komunave në veri të Kosovës. Rreth 600 mijë euro janë shpenzuar për organizimin e 10 vjetorit të shpalljes së pavarësisë së Kosovës, 500 mijë euro për shënimin e 550 vjetorit të vdekjes së Gjergj Kastriotit-Skënderbeut, kurse 300 mijë euro janë ndarë për Organizatën e veteranëve të luftës se Ushtrisë Çlirimtare të Kosovës për mbulimin e shpenzimeve të 1500 veteranëve për pushime verore në Shqipëri.
Shuma tjera më të vogla janë ndarë për aktivitete, manifestime dhe qëllime të ndryshme.
Përfaqësues të organizatave joqeveritare, konsiderojnë se përdorimi i mjeteve të rezervave shtetërore ishte i paarsyeshëm, pasi që, sipas tyre, këto mjete duhet të shpenzohen në raste emergjente.
Mexhide Demolli, drejtoreshë ekzekutive në Lëvizjen “Fol” thotë për Radion Evropa e Lirë se shpenzimi i fondit rezervë për qëllime tjera joemergjente nënkupton keqmenaxhim të këtij fondi. “Nuk është hera e parë që Qeveria e Kosovës shpenzon buxhetin në mënyrë të pakontrolluar. Shpenzimi i mjeteve të fondit rezervë, tregon për një mungesë të transparencës dhe llogaridhënies nga qeveria, pasi këto mjete janë ndarë pa ndonjë arsye të caktuar.
Vetë fakti që fondi rezervë është shpenzuar për aktivitete që nuk është i destinuar ky fond është keqmenaxhim i buxhetit”, thotë Demolli.
Në bazë të ligjit, shpenzimet e paparashikuara apo rezervat shtetërore mund të shpenzohen vetëm në raste urgjente dhe të paparashikuara.
Por, në raste të tilla, sidomos nga dëmet që kanë shkaktuar reshjet e shiut gjatë periudhës se verës, Qeveria e Kosovës nuk është treguar e gatshme të kompensojë dëmet e tilla.
Sipas të dhënave zyrtare, mbi shtatë milionë euro vlerësohen dëmet e shkaktuara në kulturat bujqësore në disa komuna të Kosovës.
Në mesin e bujqve të dëmtuar është edhe Daut Morina, nga fshati Drenoc në Komunën e Malishevës, i cili tregon se e gjithë sipërfaqja e të mbjellave në lagjen ‘Morina’ është dëmtuar.
Ai tregon se sipërfaqja me mbi 20 hektarë të mbjella me kulturën e grurit dhe rreth 2 hektarë të mbjella me perime, janë dëmtuar komplet, kurse edhe pas kërkesës për kompensim nga autoritetet komunale, ende nuk është paguar për dëmet e shkaktuara.
“Përfaqësuesit e lagjes nuk kanë bërë ndonjë vlerësim, vlerësimin e kanë bërë zyrtarë komunal, por që deri më tani dëmi nuk është kompensuar“, tha Morina .
Ndryshe, Qeveria e Kosovës ka miratuar vendimin për kompensim të menjëhershëm të dëmeve të shkaktuara këtë vit nga reshjet e shiut dhe breshrit nëpër komunat e Kosovës, por nuk dihet shuma e kompensimit.
Shqetësim për shpenzim të fondit rezervë ka paraqitur edhe Ministri i Financave, Bedri Hamza.
Në një përgjigje, zëdhënësi i kësaj ministrie Muharrem Shahini, ka thënë se ministri ka kërkuar që kërkesat e organizatave buxhetore të planifikohen më kohë dhe të futen brenda planifikimeve të rregullta të buxhetit.
Ndërsa, rezerva shtetërore të ruhet për rastet të cilat nuk kanë mundur të planifikohen apo të parashihen.
