Anëtarët e Parlamentit Europian, anëtarë të komisionit BE-Shqipëri, do të zhvillojnë më 29 tetor një vizitë në Tiranë.
Burime të Top Channel thonë se ata do të takohen me kryeministrin shqiptar, Edi Rama dhe kryetaren e Parlamentit, Elisa Spiropali.
Mësohet se pjesë e këtij delegacioni nga Strasburgu do të jetë edhe eurodeputeti grek, Fredi Beleri, ish kandidat i opozitës në bashkinë e Himarës, i dënuar për korrupsion në zgjedhje.
Lajmin e kanë raportuar gjithashtu edhe mediat greke. To Vima e shikon këtë takim si një fitore të diplomacisë greke ku vihet theksi te kushtet e Athinës që rruga e anëtarësimit të Tiranës zyrtare kalon përmes të drejtave të minoritetit grek
Sapo anëtarët e Komisionit të mbërrijnë në Tiranë, Komisioni do të informohet nga ambasadori i Bashkimit Evropian, Silvio Gonzato, i cili po merr pjesë në bisedimet e anëtarësimit BE-Shqipëri.
Menjëherë pas kësaj vijon takimi me Edi Ramën, i cili është parashikuar të zgjasë 45 minuta. Më pas do të ketë takime me përfaqësues të partive shqiptare dhe një drekë nga ambasadori e BE-së në Shqipëri në Shtëpinë Europiane, në rrugën Papa Gjon Pali. Menjëherë pas saj, do ketë një takimi me kryetaren e Kuvendit Elisa Spiropali dhe në ditët në vijim diskutime me komisionin e përbashkët BE-Shqipëri.
