Të martën është mbajtur nata e dytë e edicionit të 61-të të Festivalit të Këngës në Radio Televizionin Shqiptar.
Mbrëmja ka kulmuar me rikthimin në skenë të artistes së madhe shqiptare, Elsa Lila.
Këngëtarja e cila ka prekur festivalin gjigant të Sanremos, është rikthyer në skenën e Festivalit të RTSh-së pas një mungese rreth 25-vjeçare në paraqitjet në këtë festival.
Elsa Lila në Festivalin e 61-të të Këngës në RTSh (Foto: RTSh)
Ajo garon me këngën me titull “Evita”, të cilën e ka kompozuar dhe shkruar vet, teksa e interpretoi ‘live’ para publikut në mbrëmjen e dytë në Pallatin e Kongreseve në Tiranë.
Elsa mahniti publikun me paraqitjen e saj spektakolare, duke i lënë të shtangur të gjithë me interpretimin e fuqishëm, zërin dhe elegancën e saj në skenë.
Kjo paraqitje njëherësh është e para në publik që pas skandalit që e preki atë në fillim të këtij viti, ku e njëjta u arrestua në Itali si e dyshuar e përfshirë në një rrjet kontrabandistësh droge.
Elsa përndryshe është dy herë fituese e Festivalit të Këngës në RTSh, në vitin 1996 me këngën “Pyes Lotin” dhe në vitin 1997 me këngë “Larg Urrejtjes”.
