Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë kërcënimet verbale eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën.
Një rast i tillë ka ndodhur së fundi në fshatin Shtupeq i Vogël në Rugovë të Pejës, ku dy vëllezër dyshohet se kanë kërcënuar një zyrtar policor.
Burimet e Gazetës Sinjali brenda Prokurorisë kanë bërë me dije se kjo ka ndodhur pasi polici ua ka kërkuar atyre disa dokumente për verifikim, pasi të njëjtit po ngarkonin bagëtitë në një kamion.
Po ashtu, njëri nga vëllezërit dyshohet se i është sulur zyrtarit policor dhe ka dashur ta godas me një shkop druri.
Njësitë policore kanë dalë në vendin e ngjarjes pas thirrjes nga kolegu i tyre dhe kanë shoqëruar në stacion policor njërin nga të dyshuarit, ndërsa tjetri është arratisur.
Me urdhër të prokurorit, rasti është cilësuar ‘Kanosje’, teksa po vazhdojnë hetimet për lokalizimin e vendndodhjes së të dyshuarit të dytë.
