Publikimi i videove e fotove të ndryshme në rrjete sociale shpesh po i fut kosovarët në sherr me Policinë. Ata jo rrallëherë dalin të jenë merakli të mbajtjes së armëve, kryesisht pa leje dhe me ekspozimin e tyre në rrjete sociale, shpesh tentojnë të shfaqen si të “fortë” dhe të pakapshëm për organet e rendit, raporton Gazeta Sinjali.
Kështu vepruan edhe dy vëllezër në fshatin Doganaj të Kaçanikut, të cilët publikuan në rrjetin social Facebook fotografi me armë.
Burimet e Gazetës Sinjali brenda Prokurorisë kanë bërë me dije se pas zbulimit të rastit, njësitë policore kanë shoqëruar në stacion policor dy të dyshuarit, të cilët janë intervistuar nga organet e hetuesisë.
Po ashtu, Policia në koordinim me Prokurorinë kanë kryer bastisje në shtëpinë e të dyshuarve, por që nuk kanë arritur t’i gjejnë armët që dyshohet se u përdorën në rast.
Me urdhër të prokurorit, ndaj të dyshuarve është iniciuar rasti ‘Mbajtje në pronësi, kontroll ose posedim të paautorizuar të armëve’.
