Përgjatë vitit 2023, Gjykata Themelore në Prishtinë ka vijuar me proceset gjyqësore në rastet e njohura si, 400 kilogramë kokainë në mish të ngrirë të ardhur nga Brazili.
Po ashtu, rastin me 180 kilogramë kokainë të transportuar nëpër shtetet e Evropës, rastin me mbjelljen e 2 mijë e 58 bimëve kanabis sativa të rritura në çatinë e mullirit të fshatit Shirokë të Suharekës si dhe rastin ndaj Naser Kelmendit, i njohur si “bossi i drogës”.
Gjykimi në rastin e 400 kilogramëve drogë të ardhur nga Brazili
Për këtë rast, aktakuza ishte ngritur më 14 nëntor 2022 nga Prokuroria Speciale e Kosovës (PSRK), ku për krim të organizuar, shitblerje të narkotikëve, pengim i të provuarit apo i procedurës zyrtare dhe armëmbajtje pa leje, po akuzohen Izet Sheqiri, Faton Vrajolli, Kadri Sheqiri, Kadri Ibrahimi, Fehmi Bytyqi, Hyzri Sheqiri dhe Naim Morina.
Të akuzuarit Hyzri Sheqiri dhe Naim Morina pasi kishin arritur marrëveshje për pranimin e fajësisë për veprën penale “Pengim i të provuarit apo i procedurës zyrtare” më 22 dhjetor 2022 ishin shpallur fajtorë, duke u dënuar me 13 muaj burgim.
Lidhur me këtë rast, procesi gjyqësor ka vazhduar edhe gjatë vitit 2023, me dëgjimin e dëshmitarëve dhe administrimin e provave materiale për të akuzuarit Izet Sheqiri, Faton Vrajolli, Kadri Ibrahimi dhe Fehmi Bytyqi. Gjykimi i këtij rasti është duke vazhduar.
Në aktakuzë thuhet se, Izet Sheqiri në cilësi të pronarit të kompanisë “MC FOOD” ishte organizatori dhe udhëheqësi i grupit kriminal, me ç’rast kishte arritur që në bashkëpunim me të akuzuarit e tjerë të shfrytëzojë biznesin e tij që kishte primare transportimin e “mishit të bardhë” nga Brazili përmes Spanjës, Italisë dhe Shqipërisë të sillte 400 kilogramë drogë të llojit kokainë.
Gjykimi i rastit të 180 kilogramëve kokainë
Lidhur me këtë rast, Prokuroria Speciale e Republikës së Kosovës (PSRK), më 2 maj 2023, kishte ngritur aktakuzë ndaj Bashkim Kolshit, duke e ngarkuar për transportim të narkotikëve të llojit kokainë dhe shpëlarje parash.
Sipas aktit akuzues, Kolshi në bashkëpunim me Gunta Zunda, Sokol Krasniqi, Ervin Pelinku, Milenko Knezeviq dhe persona të tjerë të dënuar apo të akuzuar në Danimarkë për këto vepra penale, kishte arritur të transportonte kokainën nga shtetet e tjera për në Kopenhagë të Danimarkës.
Aktualisht, ky rast është në procedurën e administrimit të provave materiale dhe të dëgjimit të dëshmitarëve.
Gjykimi për 2 mijë e 59 bimë narkotike të mbjella në tavanin e mullirit
Me 6 dhjetor 2 022, Prokuroria Speciale e Republikës së Kosovës kishte ngritur aktakuzë ndaj Fethi Uygur, Alajdin Ramadani, Filip Mishevski, Erol Marku, Alban Maloku, Etan Dacic dhe Milazim Voci duke i ngarkuar me veprat penale “Krim i organizuar”, “Shitblerje të narkotikëve” dhe “Kultivim të hashashit, shkurres së kokainës ose bimëve kanabis”.
Lidhur me këtë aktakuzë, Gjykata Themelore në Prishtinë ka vijuar me procesin gjyqësor ndaj 7 të akuzuarve, me ç’rast në shqyrtimin fillestar të 29 dhjetorit 2022 njëzëri gjithë të akuzuarit ishin deklaruar të pafajshëm.
Sipas akuzës, thuhet së nën udhëheqjen e të akuzuarit Fethi Uygur me role të përcaktuara mirë për 6 të akuzuarit e tjerë, pa leje dhe pa autorizim, kanë kultivuar bimën hashash brenda objektit mulli “Voci 1” në fshatin Shirokë të qytetit të Suharekës.
Pas kontrollit dhe bastisjes së policisë, në këtë objekt ishin gjetur 2 mijë e 59 bimë narkotike të llojit kanabis sativa dhe 32 kilogramë substancë e dyshuar narkotike e llojit marihuanë, e cila ishte në proces të tharjes me qëllim që pastaj të shitej, ku të pandehurit ishin arrestuar në vendin e ngjarjes.
Merr epilog rasti i “Bossit të drogës”
Gjatë vitit 2023 ka marr epilog rasti ndaj Naser Kelmendit, i cili akuzohej për trafikim me të narkotikë.
Më 18 maj 2023, Gjykata Themelore në Prishtinë, kishte shpallur aktgjykim dënues ndaj Kelmendi, duke e dënuar me 4 vjet e 8 muaj burgim.
Ndaj aktgjykimit të shkallës së parë, ankesë kishte paraqitur Prokuroria e Prishtinës, duke i propozuar Apelit që lidhur me këtë çështje penale, të ndryshohet pjesa e vendimit lidhur me dënimin dhe të nxjerrë një vendim më të ashpër.
Me këtë aktgjykim nuk ishte pajtuar as i akuzuari Kelmendi, i cili përmes avokatit të tij kishte paraqitur ankesë në Gjykatën e Apelit.
Ndërkaq, më 25 gusht Apeli aprovoi ankesën e Kelmendit dhe të njëjtin liroi nga akuza për trafikim me narkotikë për çka ishte dënuar nga shkalla e parë me 4 vite e 8 muaj burgim.
Ndryshe, më 27 maj 2023, “Betimi për Drejtësi” solli hulumtimin “Shteti dështon të ndajë drejtësi për Naser Kelmendin të njohur si “Bossi i drogës“, ku tregohet se pse përkundër gjykimit maratonik, Naser Kelmendi rrezikonte të dalë i pagjykuar.
Ndryshe, për veprën penale të shitblerjes së narkotikëve sipas Kodit Penal të Kosovës në fuqi, parashihet dënueshmëria nga 2 deri në 12 vite burgim, për veprën penale “Krim i organizuar”, dënim me gjobë prej 250 mijë euro ose edhe me burgim nga 4 vjet deri në burgim të përjetshëm, si dhe për “Mbjellje të shkurres së narkotikut” dënim prej 1 deri në 10 vite burgim.
Rastet e raportuara për arrestime dhe paraburgime për posedim të drogës gjatë 2023-ës
Gjatë këtij viti, Gjykata Themelore në Prishtinë i kishte caktuar masën e paraburgimit Gëzim Celajt i njohuri si “Baroni i drogës”, i cili ishte i kërkuar me arrest ndërkombëtar për veprat penale trafikim me narkotikë dhe prodhimi dhe mbajtja pa leje e armëve luftarake dhe municioni.
Për narkotikë, më 15 gusht 2023 në Skenderajt ishte arrestuar E.A, 28-vjeçar për 60 kilogramë drogë të llojit marihuanë, për të cilin ishte kërkuar masës e paraburgimit prej 30 ditësh.
Edhe në operacionin “Mali” të datës 30 qershor 2023 ishin konfiskuar 35 kilogramë marihuanë, me ç‘rast është ishte arrestuar i dyshuari me inicialet J.B.
Ndërkaq, Policia e Kosovës më 16 janar 2023, kishte njoftuar për arrestimin e një personi, pasi që të njëjtit i ishin sekuestruar 18 kilogramë drogë të llojit marihuanë. Po ashtu, Policia në raportet ditore vazhdimisht ka raportuar për raste të të dyshuarve për posedim të narkotikëve.