Shërbimi i Kërkim-Shpëtimit Malor i Kosovës ka ndihmuar në një operacion në Shqipëri për shpërtimin e dy turistëve zviceranë të ngujuar në një ortek.
“Një skuadër e ShKShMK, gjendet në një operacion të ndërlikuar dhe me rrezikshmëri të lartë të kërkim- shpëtimit në afersi të fshatit Çajë, ne zonën e Kukësit, Shqipëri”, thuhet në njoftimin ShKShMK-së.
“Për më shumë se 13 orë në aksion, është bërë lokalizimi i dy turistëve zviceranë të cilët si pasojë e reshjeve të dendura të borës në ditët e fundit, kanë pësuar nga orteku i cili i ka zënë mbrenda”.
“Në orët e vona të mesnatës është bërë nxjerrja e tyre nga orteku nga anëtarët e ShKShMK-së, ku rrezikshmëria dhe zona tepër e papërshtatshme për intervenim dhe logjistikë, e kanë bërë këtë aksion tepër të ndërlikuar”.
Ata kanë njoftuar që turistët janë në një gjendje stabile, dhe pritet evakuimi i tyre.
“Turistët janë në gjendje stabile shëndetësore, duke pësuar hipotermi dhe dyshohet për fraktura të gjymtyrëve, të cilat mbesin të vërtetohen nga ekzaminimet e mëtutjeshme mjekësor”.
“Pritet të bëhet evakuimi i tyre permes helikopterit të Emergjencave Shtetërore të Shqipërisë”.
