Kryeshefit të arrestuar të KEK-ut, Nagip Krasniqit, i dyshuar për keqpërdorim të detyrës zyrtare i është refuzuar ankesa për ndërprerjen e masës së paraburgimit nga Gjykata e Apelit.
Apeli ka lënë në fuqi masën e paraburgimit prej 30 ditësh ndaj tij të vendosur nga Gjykata Themelore e Prishtinës.
Sipas dosjes së Prokurorisë, e publikuar nga Kallxo.com, Komisioni vlerësues i tenderit kishte rekomanduar anulimin e aktivitetit të prokurimit me arsyetimin se operatori ekonomik “L… S..” nuk i është përmbajtur kushteve të autoritetit kontraktues i cili kishte kërkuar ndryshimin e kushteve të veçanta.
“Përkundër këtij rekomandimi, Nagip Krasniqi kishte urdhëruar me shkrim shefin e prokurimit Y. D. që të nënshkruante këtë kontratë e cila kontratë duke mos u ekzekutuar Korporatës i ka shkaktuar dëme dhe pasoja të drejtpërdrejta dhe të pariparueshme financiare në dëm të buxhetit të Republikës së Kosovës”, thuhet në aktvendimin e Apelit.
Mbrojtja e të pandehurit Krasniqi përmes një reagimi në Facebook, ka deklaruar se Apeli i ka besuar fjalës së Prokurorisë, ndonëse e njëjta nuk i ka dorëzuar gjykatës asnjë provë të vetme, vendimin për vazhdim të paraburgimit e mbështesin vetëm në pretendime të prokurorisë.
Në kërkesën për caktimin e masës së paraburgimit të datës 20.04.2023, dyshohet se Nagip Krasniqi prej vitit 2022, ka keqpërdorur pozitën e tij zyrtare në cilësinë e kryeshefit ekzekutiv të KEK-ut.
Sipas dosjes së prokurorisë Krasniqi më 26 janar 2023, kishte lidhur kontratë të dëmshme në kundërshtim me Ligjin e Prokurimit Publik duke shkelur nenin 7, nenin 35 par.3, nenin 35 par. 2.1(iii), dhe nenin 57 par.2 të këtij ligji, ashtu që duke vepruar me tenderin KEK-23-130-5-1-5, i emërtuar si “Riparimi kapital emergjent i kaldajës blloku A5 ”, me procedurë të negociuar pa publikimin e njoftimit për kontratë, ka lidhur kontratë me kompaninë Litwin SA, me çmim prej 3.,495,392.42 euro, duke ndryshuar kushtet e veçanta të kontratës.
Dosja e Prokurorisë tutje thekson se i dyshuari Nagip Krasniqi “Duke qenë në dijeni se operatori ekonomik ka interes financiar, pas nënshkrimit të kontratës me të me procedurë të negociuar, përfaqësuesit e saj respektivisht I. Z.., e ka angazhuar në cilësi të mbrojtësit për veti gjatë disa procedurave hetimore, e të cilat procedura nga ana e organeve të ndjekjes zhvilloheshin për çështje të dyshuara pikërisht të ndërlidhura me KEK-un”. Sipas dosjes së Apelit, ka bazë ligjore për caktimin e paraburgimit sepse po te gjendet në liri i pandehuri, do të mund të pengojnë zhvillimin normal të procedurës penale, për faktin e ndikimit në dëshmitarët të cilët kanë njohuri lidhur me ngjarjen si A. Sh., Y. D., R. B., S. I., E. T., etj., në dëshminë e të cilëve ekziston rreziku që të ndikohet lehtë për faktin se shumica prej tyre janë vartësit e tij, pasi që të njëjtit nuk janë dëgjuar nga ana e Prokurorisë.
Sipas kësaj gjykate ekziston rreziku që i pandehuri po të gjendet në liri do të pengojnë në rrjedhën normale të procedurës penale që është duke u zhvilluar lidhure me këtë rast penal. Kujtojmë që kryeshefi i KEK-ut, Nagip Krasniqi ishte arrestuar më 19 prill 2023 nën dyshimet për keqpërdorim të detyrës zyrtare. /kallxo.com/.
