Udhëheqësi i serbëve të Bosnjës, Milorad Dodik, njoftoi bashkimin e Republikës Srpska me Serbinë, presidenti i së cilës Aleksandar Vuçiç kritikoi përsëri Kroacinë për shkak se nuk iu lejua të vizitonte privatisht Jasenovacin vitin e kaluar.
Vuçiqit iu ndalua hyrja në Kroaci vitin e kaluar sepse kishte ndërmend të shkonte në Jasenovac për një vizitë private, pa asnjë njoftim tek autoritetet kroate dhe me sa duket për qëllime të vetëpromovimit.
Gjithashtu Presidenti i RS Milorad Dodik përsëri manipuloi të dhënat për numrin e viktimave në Jasenovac dhe i trefishoi ato, duke deklaruar se në Jasenovac vdiqën 500 mijë serbë, të vrarë nga “lëvizja ustash dhe populli kroat i asaj kohe”. Numri zyrtar dhe me emër i viktimave të Jasenovacit është 83,145.
Të gjithë serbët në një shtet
Ai pretendon se ishte pjesë e një plani afatgjatë që filloi në Luftën e Parë Botërore dhe vazhdoi me “dëbimin e serbëve” nga Kroacia dhe Sllovenia në vitet 1990 dhe me sulmet ajrore të NATO-s ndaj ushtrisë së serbëve të Bosnjës dhe Serbisë.
Ai deklaroi se serbët janë viktimat më të mëdha të luftërave gjatë shpërbërjes së ish-Jugosllavisë, të cilët për këtë arsye kanë të drejtë të jenë në një shtet. “Ne i përkasim një kombi dhe një ditë do të jemi një vend dhe askush nuk do të na pengojë ta bëjmë këtë sepse është e drejta jonë”, tha Dodik, duke paralajmëruar se do të luftojë për të deri në fund të jetës.
Ai përmendi veçanërisht se RS duhet të bashkohet me Serbinë, duke pohuar se BiH sot kërcënon lirinë e serbëve.
Ai përsëri tha se nuk kishte gjenocid kundër boshnjakëve në Srebrenicë në vitin 1995, dhe duke bërtitur nga foltorja, ai akuzoi Britaninë e Madhe se po përpiqej të impononte etiketën e një kombi gjenocidal ndaj serbëve të Bosnjës për shkak të atij krimi.
Ai kritikoi gjithashtu presidentin kroat Zoran Milanoviç për vizitën e tij në Derventa në mars, kur ai i dha medalje brigadës 103 HVO për meritat e tyre në luftën për mbrojtjen e Posavinës boshnjake.
