Kryetari i Aleancës për Ardhmërinë e Kosovës, Ramush Haradinaj ka përkujtuar Ditën Kombëtare të të Zhdukurve të luftës së fundit në Kosovë si dhe Masakrën e Mejës.
Ish-kryeministri u shpreh se kurrë nuk do të ndalet kërkimi për drejtësi të tyre.
“Sot, Kosova shënon Ditën e të Pagjeturve, njëkohësisht edhe ditën e masakrës së Mejës”, ka shkruar Haradinaj në Facebook.
“Nuk është rastësi, që Dita e të Pagjeturve, shënohet pikërisht në ditën e masakrës së Mejës. Në këtë datë forcat okupatore kryen njërën ndër masakrat më të mëdha në Kosovë, duke vrarë 377 motra e vëllezër tanë shqiptarë, një pjesë e tyre ende të pagjetur. Shqiptarë të pambrojtur të dy besimeve fetare që kishin vetëm një ëndërr, lirinë e Kosovës”.
“Kurrë nuk do të harrojmë kujtimin për ta. Kurrë nuk do të ndalemi së kërkuari drejtësi. Pushofshin të qetë në tokën e Kosovës!”.
