Ish-zyrtari i gjendjes civile, Besim Xhakli, ka rënë në prangat e Policisë së Kosovës nën dyshimet se ka keqpërdorur detyrën e tij zyrtare. Xhakli, i cili tashme mban pozitën e Inspektorit Komunal për lirimin e hapësirave publike, dyshohet po ashtu edhe për falsifikim të dokumentit zyrtar.
Burimet e Gazetës Sinjali brenda Prokurorisë kanë zbardhur detajet lidhur me veprat të cilat rëndojnë mbi zyrtarin ferizajas, i cili në vitin 2019 dyshohet se regjistroi një shtetas turk në sistemin e gjendjes civile, ndonëse ky i fundit nuk kishte plotësuar kriteret për marrjen e shtetësisë së Republikës së Kosovës.
Në këtë formë, Xhakli ia kishte mundësuar shtetasit turk që të pajiset edhe me pasaportë kosovare.
Ai është intervistuar nga organet e hetuesisë dhe më pas me vendim të prokurorit është dërguar në mbajtje.
Xhakli do të hetohet për veprat penale ‘Keqpërdorimi i pozitës apo autoritetit zyrtar’ dhe ‘Falsifikim i dokumentit zyrtar’.
Kujtojmë se për një rast të njëjtë, Xhakli prillin e vitit 2022 ishte dënuar me 2 mijë euro gjobë, pasi kishte pranuar fajësinë për veprën penale ‘Falsifikimi i dokumentit zyrtar’. Sipas aktakuzës së ngritur në vitit 2021, Xhakli ngarkohej se më 15 gusht 2018, me dashje, duke shfrytëzuar detyrën e tij zyrtare si zyrtar i gjendjes civile në Komunën e Ferizajt, në sistemin elektronik të gjendjes civile, kishte shënuar të dhëna të rreme, gjoja se personi me emër A.I., kishte qenë i regjistruar në librin amëz të të lindurve në numër të faqes 358, me numër rëndor 1531 edhe pse e ka ditur se kjo nuk është e vërtetë.
Gjithnjë sipas aktakuzës, aty thuhet se në numrin e faqes 358, me numër rendor 1531, të librit amëz, është regjistruar një person tjetër me emër A.N., andaj, për pasojë personi me të dhënat A.I., kishte arritur të pajisej me dokumente personale, si letërnjoftim dhe pasaportë të Republikës së Kosovës.
