Në mungesë të kuorumit për të marrë vendime, ka dështuar mbledhja e Kryesisë së Kuvendit.
Shefi i Grupit Parlamentar të Aleancës për Ardhmërinë e Kosovës, Besnik Tahiri, tha se u diskutua që seanca për buxhetin të mbahet më 14 dhjetor dhe më 15 raportimi vjetor i presidentes Vjosa Osmani.
“Nuk do të marrë mbështetje buxheti në këto rrethana, nuk përkon me kërkesat që kemi”, tha Tahiri.
Edhe shefi i deputetëve të Partisë Demokratike të Kosovës, Abelard Tahiri, kërkoi që Qeveria të reflektojë karshi kërkesave të kategorive të ndryshme – veteranëve, policëve, zjarrfikësve.
Kur të votohet buxheti pas dy javësh, sipas Tahirit, këto kërkesa duhet të përmbushen.
