Pandemia e coronavirusit do të nxisë rivalitetin edhe më shumë midis SHBA-së dhe Kinës, por disa analistë e shohin Pekinin se ai do të dalë më i fuqishëm globalisht nga kjo pandemi.
Tensionet tashmë janë ndezur në disa fronte që prej fillimit të pandemisë. Uashingtoni dhe Pekini po akuzojnë njëri-tjetrin për origjinën e vërtetë të shpërthimit të coronavirusit. Presidenti amerikan Donald Trump kërcënoi përsëri vendin aziatik me tarifa. Të dy vendet madje janë grindur për çështjen e Detit të Kinës së Jugut, shkruan CNBC.
Pandemia do të “rrisë rivalitetin strategjik SHBA-Kinë”, thotë Verisk Maplecroft (kompani britanike që merret me strategjitë globale).
″Coronavirus padyshim nxit rritjen e tensioneve gjeopolitike mes SHBA dhe Kinës”, thotë Hugo Brennan, analist kryesor në Verisk Maplecroft, duke parashikuar se virusi do të mbetet një burim kryesor i fërkimit për 12 muajt e ardhshëm, transmeton Telegrafi.
“Në kohë krize, rivalitetet globale kanë tendencë të intensifikohen më shumë sesa të zvogëlohen. Kriza e coronavirusit ka çuar në një përkeqësim të mëtejshëm në marrëdhëniet tashmë të këqija midis Kinës dhe SHBA-së”, thotë Brennan.
“Epidemia e coronavirusit nuk është shkaku i tensioneve të rritura në marrëdhëniet SHBA-Kinë, megjithatë; thjesht është duke përkeqësuar situatën që ekziston prej vitesh ndërsa të dy vendet konkurrojnë për mbizotërim ekonomik”.
Të dy gjigantët ekonomikë kanë përqafuar në një luftë tregtare për dy vitet e fundit, e cila është përhapur në mosmarrëveshje mbi të drejtat e pronësisë intelektuale dhe ka evoluar në çështje më të mëdha siç është mbizotërimi i teknologjisë. Në janar, të dy vendet arritën një marrëveshje tregtare (faza e parë) përpara se të goditej nga virusi.
Por e ardhmja e asaj marrëveshje është tani në diskutim – javën e kaluar, Trump kërcënoi vendin aziatik me tarifa të reja në shenjë hakmarrjeje për reagimin e saj ndaj virusit.
“Trump ka të ngjarë të ndërtojë fushatën e tij presidenciale, duke i vënë ‘fajin Kinës’, tha Brennan, dhe nëse ai rizgjidhet, kjo do të çonte në katër vjet tjera në një “marrëdhënie të frikshme” me Pekinin.
Pekini do të përdorë krizën si mundësi për të shtrirë ndikimin global
Megjithatë, pavarësisht retorikës anti Kinë, analistët thonë se pandemia mund të shpejtojë ndryshimin në fuqinë globale nga Perëndimi në Lindje.
Kina është fajësuar jo vetëm nga SHBA, por edhe Mbretëria e Bashkuar dhe Australia për përgjigjen e saj fillestare ndaj shpërthimit, e cila u kritikua si e ngadaltë dhe jo transparente.
Por kjo nuk do ta ndalojë gjigantin aziatik të shtrijë ndikimin e tij në botë. Kina madje mund të përdorë krizën si një mundësi për të ngritur profilin e saj dhe për të zgjeruar ndikimin e saj, veçanërisht mbi vendet e goditura nga pandemia, duke ofruar mbështetje shumë të nevojshme, thonë analistët. Pekini tashmë është futur në të ashtuquajturën diplomaci maskash, duke dërguar pajisje mjekësore në vendet e prekura.
Në veçanti, Kina mund të çimentojë më tej praninë e saj në pjesë të Afrikës, Evropës Lindore, Azisë Juglindore dhe Amerikës Latine.
Nga ana tjetër, Kina, thjesht për shkak se ka dalë e para nga kriza, do të jetë gjithashtu e para që do të rikuperohet ekonomikisht. /Telegrafi/