Pas ngjarjes së rëndë të ndodhur në Krujë, kur vëllezërit e tij, djali i tij dhe anëtarë të tjerë të fisit Rraja kanë dhunuar barbarisht dy kushërinjtë, Jashar dhe Bilbil Maja, deputeti i PS Rrahman Rraja ka dhënë ditën e sotme dorëheqjen.
Në një reagim në rrjete sociale Rraja u ka kërkuar ndjesë dy viktimave të dhunës, të gjithë kolegëve të grupit parlamentar dhe votuesve që e emëruan kryetar komune dhe i dhanë 2 mandate si deputet, nuk le pas as kryetarin e partisë Edi Ramës, siç shkruan ai për shqetësimin e madh që i ka shkaktuar. Mes rreshtash thotë se dështoi si prind, ndërsa i ka bërë thirrje djalit të tij të dorëzohet para drejtësisë.
Nuk kam fjalë për ta shprehur sikletin karshi të gjithë atyre që më kanë besuar gjithë këto vite. Fatkeqësisht unë dështova si prind dhe ndjehem i turpëruar publikisht nga fëmija im. Ju kërkoj ndjesë shokëve dhe kolegëve të grupit parlamentar dhe deklaroj dorëzimin e mandatit të deputetit dhe tërheqjen time nga jeta politike. Ju kërkoj ndjesë atyre që më kanë dhënë votën prej vitit 2000 si kryetar komune dhe prej 2 mandatesh si deputet.
Ju kërkoj ndjesë viktimave të asaj dhune turpëruese për familjen time. I bëj thirrje djalit tim të dorëzohet para drejtësisë. Zoti më dhëntë forcë që ta përballoj këtë dhimbje të madhe dhe jetë që ta shlyej këtë turp që më la mbi shpatulla si gur im bir. Në fund mirënjohje dhe ndjesë edhe kryetarit të partisë dhe kryeministrit, i cili nuk më kishte asnjë borxh për këtë shqetësim kaq të madh publik që i shkaktova.”, shkruan ai.
