Deputeti i LVV-së, Valon Ramadani, të enjten e ka nisur pak më ndryshe fjalën e tij në Kuvendin e Kosovës.
Në seancën e sotme plenare, ligjvënësi i pushtetit falënderoi të gjithë gazetarët dhe pjesëtarët e mediave, që kanë raportuar nga komunat veriore, pavarësisht sulmeve dhe rreziqeve që u kanë kanosur nga bandat kriminale.
Ai duke përmendur punën e tyre heroike bashkë me Policinë e Kosovës, tha se Kosova po bëhet shembull i lirisë së shprehjes dhe medias së lirë.
“Puna e tyre heroike dhe e policëve na garanton për triumfin e demokracisë së Kosovës. Kosova po bëhet shembull i lirisë së shprehjes dhe medias së lirë”, tha ai, teksa shtoi se sulmuesit e gazetarëve në veri janë mbrapa grilave.
Për këtë, ai falënderoi Policinë e Kosovës për sundimin e ligjit dhe rendit në veri të vendit, transmeton Paparaci.
“Kjo është e pamundur pa punën shembullore të gazetarëve. E kam dënuar dhe e dënoj sulmet ndaj mediave”, shtoi ai.
Ai pati kritika ndaj Beogradit zyrtar. Shtoi se presidenti serb, Aleksandar Vuçiq i kontrollon dhe sundon mediat atje.