The Telegraph ka zbuluar se Leonard Farruku, shqiptari 27-vjeçar, i cili pagoi 4,000 euro (3,436 paund) për të kaluar Kanalin me një varkë të vogël verën e kaluar, dyshohet se është vetëvrarë në Bibby Stockholm pasi kishte javë që ankohej për shëndetin e tij mendor.
Një ditë para se të vdiste, sipas emigrantëve të tjerë në maune, ishin dëgjuar të bërtitura dhe përplasur në murin e kabinës së tij. Ai ishte gjallë kur azilkërkuesi me të cilin ndante kabinën e tij u ngrit për të shkuar në qendrën e IT në maune.
Stafi zbuloi trupin e të riut shqiptar menjëherë, shkruan The Telegraph.
Motra e tij Jola Dushku, e cila jeton në Lombardi të Italisë, tha se ishte e tronditur nga lajmi, të cilin e morën vesh nga të afërmit në Mbretërinë e Bashkuar të kontaktuar nga policia që po hetonte vdekjen.
Kjo është vetëvrasja e dytë pasi një 23-vjeçar u përpoq të bënte të njëjtën gjë në një parking hoteli në Essex muajin e kaluar, pasi kishte dëgjuar se do të transferohej në Bibby Stokholm.
Farruku mbërriti në Britaninë e Madhe me një varkë të vogël gushtin e kaluar si pjesë e një numri prej më shumë se 12,000 shqiptarësh përgjatë Kanalit, një e katërta e të gjitha kalimeve vitin e kaluar.
Një zëdhënës i Home Office tha se, “Ky ishte një incident tragjik dhe mendimet tona shkojnë për të gjithë të prekurit. Mirëqenia e të gjithë atyre në kujdesin tonë është e një rëndësie të madhe dhe ne e marrim përgjegjësinë tonë për mirëqenien e tyre jashtëzakonisht seriozisht. Kjo tani do të hetohet nga policia dhe mjekësia ligjore. Është e drejtë që të vërtetohen faktet dhe rrethanat që lidhen me këtë vdekje.”