Dëgjimi i provave të prokurorisë në çështjen gjyqësore kundër Hashim Thaçit, Kadri Veselit, Jakup Krasniqit e Rexhep Selimit do të fillojë nga data 11 prill 2023.
Kështu ka bërë të ditur kryetari i turpit gjykues, Charles L. Smith derisa ka lëshuar disa urdhra në fund të konferencës përgatitore për prokurorinë.
Gjithashtu ai ka caktuar 1 prillin e vitit 2025 datë për mbylljen e çështjes së prokurorisë.
Pas vendimit që 3 prilli të jetë data kur fillon ky proces gjyqësor, Smith ka bërë të ditur se një tjetër konferencë përgatitore do të mbahet më datën 20 mars.
“Duke pasur parasysh parashtrimet e palëve ekziston një arsye bindëse për ndryshimin e kohës, deklaratat hapëse do të mbahen me datën 3,4 dhe 5 prill 2023. Dëgjimi i provave do të fillojë më datë 11 prill 2023… Si kryegjykatës i këtij turpi gjykues mbaj parasysh gjendjen dhe pajtimin ndërmjet palëve lidhur me çështjet faktike, në pajtim me rregullën 102 (3) të rregullores turpi gjykues urdhëron ZPS-në që të dorëzojë njoftimin e ndryshuar sipas rregullës 102 (3) deri të premten më datë 17 shkurt 2023. Trupi gjykues përcakton datën e mbylljes së çështjes së prokurorisë me datë 1 prill 2025”, ka thënë kryetari i trupit gjykues.
Ndërsa mbrojtja e ish kryetarit të Kuvendit, Kadri Veseli, avokati Ben Emmerson ka kërkuar që prokuroria të njoftojë grupin e radhës të dëshmitarëve që do të thërrasë për të dhënë dëshmi.
“Prokuroria do të duhet që të njoftojë grupin pasardhës të dëshmitarëve që do të thërrasë për të dhënë dëshmi në mënyrë të tillë që ne të fillojmë me përgatitjet paraprakisht”, ka thënë Emmerson.
Gjithashtu ai ka kërkuar të sqarohet nëse do të ketë dëshmitarë të cilët mbetën në listën e personave të dyshuar të prokurorisë.
“Dëshmitarët që do të thirren nga ZPS në veçanti lidhur me çështje që kanë të bëjnë me zingjirin komandues të UÇK-së, intervistat që janë bërë nga ZPS janë bërë në kuadrin e tyre të thirru si të dyshuar, kështu nëse këta persona do të vinë dhe të japin dëmshmi, me intervistimin e tyre në cilësinë e të dyshuarve, cilat do të jenë pasojat për dëshmitarët, jo pse ne jemi këtu për të përfaqësuar interesat e dëshmitarëve por sigurisht dëshmitarët kanë të drejtën të mos thonë diçka që inkriminojnë vetën e tyre ose fajësojnë vetën e tyre. Nga ana tjetër ata kanë të drejtën të përfaqësohen nga pikëpamja ligjore, kjo është e rëndësishme për ne sepse një dëshmitar i cili mund të inkriminojnë vetën mund të ketë motive të tjera shtesë”, ka thënë avokati i Veselit.
Këtë, gjykatësi Smith ka thënë se do ta marrin parasysh dhe e ka mbyllur konferencën e sotme.
Gjykimi kundër ish krerëve të Ushtrisë Çlirimtare të Kosovës ishte caktuar për 1 mars të këtij viti por në konferencën e sotme përgatitore, gjykatësi ka dhënë urdhër që i njëjti të fillojë më 3 prill.
Data 3 prill ishte kërkesë e avokatëve mbrojtës dhe nuk kishte kundërshtim nga ana e prokurorisë.
Në pjesën e parë të konferencës Zyra e Prokurorit të Specializuar ka bërë të ditur se do të thërrasë mbi 300 dëshmitarë.
Aty ZPS ka deklaruar se nuk ka ndërmend të zvogëlojë akuzat në këtë moment kohor derisa ka shtuar se synon të paraqes prova lidhur me çdo vend të pretenduar krimi.
Ndërsa turpi gjykues edhe njëherë ka shprehur shqetësimin lidhur me kohën që ka kërkuar prokuroria për çështjen e saj dhe që arrin deri në 700 orë.
Aktakuza ndaj Hashim Thaçit, Kadri Veselit, Jakup Krasniqit dhe Rexhep Selimit lidhur me pretendimin për krime lufte, është konfirmuar më 26 tetor 2020 ndërsa në paraqitjet e tyre të para në Dhomat e Specializuara në Hagë ata janë deklaruar të pafajshëm.
Ata po qëndrojnë në paraburgim në Hagë prej nëntorit të vitit 2020.
Më 29 prill, Zyra e Prokurorit të Specializuar ka dorëzuar një aktakuzë të ndryshuar ndaj Thaçit dhe të tjerëve ku pretendon se të akuzuarit kanë kryer krime lufte në Gjilan, Budakovë e Semetishtë, njofton KP/Telegrafi/
