Ministri i Punëve të Jashtme të Serbisë, Ivica Daçiq e quajti joreale kërcënimin e presidentit francez Emmanuel Macron se BE-ja do të shqyrtojë kthimin e vizave për Kosovën dhe Serbinë nëse nuk bien dakord për Kosovën, të paktën kur bëhet fjalë për Serbinë.
Dje, presidenti Aleksandar Vuçiq paralajmëroi se Serbia do të përballet me presione dhe kërcënime të reja për Kosovën, ndërsa Daçiq thotë se pyetja kryesore me të cilën përballet është “kur ta zbatojë këtë për Kosovën”.
“Po pyes, mirë, kur do të zbatohet ajo që kemi nënshkruar dhjetë vjet më parë – Bashkësia e Komunave Serbe?! Askush nuk iu përgjigj asgjë. Kurti thotë se nuk i intereson më marrëveshja e Brukselit. E kemi edhe problemin që nuk do të ndalet me promovimin e Kosovës. Presioni do të bëhet dhe e keni parë edhe për çfarë po fliste Emmanuel Macron tani, për heqjen e liberalizimit të vizave. Nuk mendoj se është realiste dhe nuk mendoj se është e mundur dhe mendoj se është më shumë një kërcënim që i drejtohet Kosovës e jo Serbisë”, tha Daçiq.
Nuk mund ta mbrojmë Kosovën pa mbështetjen e miqve tanë, thekson Daçiq. Ai shton se tema e rëndësishme është se kë do të ketë Serbia në anën e tyre kur të jetë e nevojshme.
