Lirimi i pengjeve izraelite ishte tema kryesore e bisedimeve të Kryeministrit Netanjahu me kabinetin e luftës, pas lajmeve se së shpejti do të ketë një marrëveshje me Hamasin për një armëpushim 5 ditor.
Gjatë fjalës së tij lideri izraelit informoi anëtarët e kabinetit se shumë shpejt do të ketë lajme të mira për çështjen e pengjeve, që tashmë qëndrojnë në robëri në duart e Hamasit, që prej 7 tetorit.
Më tej, Netanjahu u takua dhe me ushtarët e një reparti, të cilëve iu përsëriti qëndrimin se shkatërrimi i Hamasit vijon të jetë një nga objektivat kryesore.
Mediat ndërkombëtare i kanë bërë jehonë një marrëveshje të mundshme mes Izraelit dhe Hamasit në orët në vijim, e cila sipas tyre bëhet për motive humanitare.
Sipas CNN, e cila citon disa burime, palët kanë rënë dakord që për çdo peng izraelit të lirohen 3 palestinezë që qëndron në burgje, kryesisht fëmijë dhe gra.
Gjithashtu, pjesë e akordit është një armëpushim 4-5 ditor që mund të zgjatet në varësi të pengjeve të liruara, ndërkohë që Izraeli do të ndalojë mbikëqyrjen ajrore me dronë në Rripin e Gazës.
Nga lajmet e fundit nga fronti i luftës raportohet se ushtria izraelite ka vrarë gjatë një sulmi në Gaza dhe nipin e liderit të Hamasit, Ismail Haniyeh.