Nënkryetarja e PDK-së, Vlora Çitaku tha se “Qeveria Kurti nuk e ka as një meritë për marrëveshjen me Korporatën e Sfidave të Mijëvjeçarit (MCC).
Sipas saj Qeveria aktuale veç çka e ka devijuar procesin.
“Në ceremoninë për nënshkrimin e marrëveshjes me MCC, marrëveshje për të cilën kjo qeveri nuk ka asnjë meritë, në fakt vetëm e ka devijuar procesin nga gazsjellësi në bateri, Kryeministri Kurti paska zgjedhur të thumbojë opozitën”, ka shkruar Çitaku në Facebook, të enjten.
Ajo më tej shtoi se “nikoqirët e ceremonisë janë vu në siklet”.
“Kryeministër, në SHBA e përfaqëson Kosovën, jo VV-në. Kur nënshkruan marrëveshje nënshkruan në emër të Kosovës, jo në emër të partisë”, ka thënë Çitaku. “Koncepti parti-shtet është fundosur në Evropë, falë SHBA-së”.
Kosova e ka nënshkruar një marrëveshje me vlerë 236 milionë eurosh për transformimin e sektorit të energjisë, prej tyre 202 milionë do të jenë financim i MCC.
