Nënkryetarja e Partisë Demokratike të Kosovës ka thënë se nëse PDK udhëheq me qeverinë e vendit, tarifat që ekzistojnë për produkte amerikane, e që sic i quan Çitaku janë mbetje e administratës së UNMIK-ut, do të hiqen dhe atë menjëherë.
E plotë:
Raporti i Kosovës me Shtetet e Bashkuara të Amerikës nuk ka qenë kurrë një marrëdhënie transaksionale.
Mbështetja që SHBA i ka dhënë Kosovës nuk matet me para. Ajo është ndërtuar mbi vlera të përbashkëta: liria, demokracia, dhe e drejta e popujve për të jetuar të lirë dhe të barabartë.
Në marrëdhëniet ekonomike, Kosova ka pasur një status të privilegjuar në tregun amerikan. Kjo është dëshmi e respektit dhe besimit që Shtetet e Bashkuara kanë treguar ndaj nesh për dekada me radhë.
Tarifat që sot ekzistojnë ndaj produkteve amerikane janë më shumë një mbetje e së kaluarës administrative nën UNMIK, sesa një vendim i një Kosove sovrane. Këto tarifa nuk reflektojnë frymën e aleancës sonë dhe nuk i shërbejnë së ardhmes që duam të ndërtojmë.
Me ne në krye të qeverisë, ato tarifa do të hiqen menjëherë.
Ky nuk është vetëm një akt politik i mençur – është një hap drejt një ekonomie më të hapur, më të fuqishme dhe më konkurruese. Është një angazhim për partneritet të vërtetë, që i shërben qytetarëve tanë, bizneseve tona, dhe zhvillimit të vendit.
Bashkë me SHBA-të, ne nuk ndërtojmë vetëm marrëdhënie, ne ndërtojmë të ardhmen.
