Lorik Cana duket gjithnjë e më pranë Marsejës tashmë që nuk është më pjesë e futbollit aktiv, shkruan Panorama.
Ish-kapiteni i kombëtares shqiptare ka marrë një tjetër ftesë nga drejtuesit e klubit francez, këtë radhë për të qënë i pranishëm në stadium gjatë ndeshjes së mbrëmjes së sotme mes Marsejës dhe Monakos, e vlefshme për Ligën 1, krahas disa ish-futbollistëve të tjerë që kanë lënë gjurmë në historinë e ekipit.
Që pas kampionatit europian, ku Cana luajti dhe ndeshjet e fundit si futbollist, ai është parë shpesh afër aktiviteteve të Marsejës, madje nuk kanë qënë të pakta herët që është folur për një aventurë të re të tijën në një pozicion në stafin drejtues.
Megjithatë, Cana, i cili është duke ndjekur dhe kurset e UEFA-s për trajner dhe ka arritur të marrë deri më tani licencën UEFA A, nuk i ka varur ende zyrtarisht këpucët në gozhdë.
