Kryetari i Partisë Socialdemokrate, Dardan Molliqaj ka reaguar pasi pikërisht më 17 shkurt do të mbahet seanca e radhës në Gjykatën Speciale për ish krerët e UÇK-së.
Molliqaj në Facebook ka shkruar se dita e gjykimit të historisë dhe përpjekja jonë çlirimtarë po përputhet irnokisht edhe me kalendarin e Gjykatës Speciale.
“Kjo gjykatë nuk e njeh historinë e Kosovës. Është indiferente ndaj saj. 17 shkurti për këtë trupë gjykuese është veç një ditë tjetër pune, jo etike në karrierën e tyre personale”, ka shkruar ndër të tjera Molliqaj.
Postimi i plotë:
Në Ditën e Pavarësisë gjykohet UÇK-ja
Dita e gjykimit të historisë dhe përpjekja jonë çlirimtare po përputhet ironikisht edhe me kalendarin e Gjykatës Speciale. Bash ditë gjykimi, për ata që mbahen peng dhe për ne si shoqëri që deshëm çlirimin.
Kjo gjykatë nuk e njeh historinë e Kosovës. Është indiferente ndaj saj. 17 shkurti për këtë trupë gjykuese është veç një ditë tjetër pune, jo etike në karrierën e tyre personale.
Ndërsa ata që po gjykohen politikisht dhe padrejtësisht ishin luftëtarët e vyer të çlirimit që kulmoi me shpalljen e pavarësisë së Republikës së Kosovës.
17 shkurti po merr shumë kuptime. Kësaj radhe nuk kemi festë. Kjo datë thërret për reagimin e secilit. Ata mbrojtën vendin, ne duhet t’i mbrojmë ata edhe me këtë datë.
