Gjykata Administrative Federale në Zvicër ka vendosur se emri Burek King është shumë i ngjashëm me atë të gjigantit amerikan Burger King. Prandaj, marka tregtare nuk ka arritur të regjistrohet si markë në Institutin e Pronësisë Intelektuale në Zvicër.
Rrjeti i restoranteve Burek King, i themeluar nga dy shqiptarë në Zvicër, nuk do të mund ta regjistrojë si markë emrin Burek King – për shkak të rrezikut të ngatërrimit me gjigantin amerikan të ushqimit të shpejtë Burger King.
Kështu bën të ditur mediumi “Swissinfo”.
Biznesi që fillimisht ishte titulluar Balkanika Burek u bë Burek King në vitin 2020. Menaxherët e saj, Fatmir Mehmedi dhe Bekim Limani aktualisht po shesin burekët e tyre në kantonet e Soloturnit, Lucernit dhe Cyrihut
Pas ndryshimit të emrit, dy themeluesit donin të regjistronin markën tregtare në Institutin Federal Zviceran të Pronësisë Intelektuale (IPI). Por marka tregtare u regjistrua vetëm në një masë të kufizuar sepse Burger King e kundërshtoi këtë veprim.
Dy pronarët e restoranteve më pas paraqitën një ankesë në Gjykatën Administrative Federale, e cila tani ka konfirmuar vendimin e IGE-së.
Gjyqtarët besojnë se dy markat mund të ngatërrohen për shkak të ngjashmërisë së emrave. Është gjithashtu e mundur që konsumatorët të supozojnë se të dy zinxhirët kanë marrëdhënie ekonomike me njëra-tjetrën. Sipas tyre, oferta e Burek King mund të ishte zgjeruar në vitet e ardhshme.
Sipas gjykatës, mund të ketë edhe një ngatërresë, sepse të dy emrat e përshkruajnë me shkronjë të madhe fjalën “King”. Prandaj, padia e Burek King u hodh poshtë në favor të Burger King. Zinxhiri amerikan i ushqimit të shpejtë u mbështet në regjistrimin e bërë nga viti 1999 dhe në popullaritetin e madh që ka.
