Një komandant i organizatës ekstremiste të Shtetit Islamik (IS) hodhi në erë veten ndërsa forcat turke u përpoqën ta kapnin atë në veri të Sirisë, tha një grup monitorues pasi qeveria turke njoftoi se kishte neutralizuar udhëheqësin e dyshuar të grupit xhihadist.
“Komandanti i Shtetit Islamik, të cilin nuk mund ta konfirmoj se ishte lideri i grupit, hodhi në erë veten duke aktivizuar rripin e tij me eksploziv, sepse mendonte se do të kapej në Jandaris, në rajonin e Afrinit,” tha Rami Abdel Rahman, kreu i Observatori Sirian për të Drejtat e Njeriut (SOHR), për agjencinë dpa.
Të dielën, presidenti turk Rexhep Tajip Erdogan tha se Turqia kishte “neutralizuar” liderin e dyshuar të Shtetit Islamik në Siri. Erdogan tha se organizata e inteligjencës e ndoqi Abu Husein al-Qurayshi për një kohë të gjatë.
ISIS e zgjodhi atë si lider në fund të vitit të kaluar
Burimet siriane lokale dhe të sigurisë thanë se bastisja ndodhi në qytetin verior sirian të Jandaris, i cili është nën kontrollin e grupeve rebele të mbështetura nga Turqia dhe një nga më të goditurit në tërmetin e 6 shkurtit që goditi Turqinë dhe Sirinë.
Një nga banorët tha se përleshjet kanë nisur në periferi të Jandaris mbrëmjen e së dielës dhe kanë zgjatur rreth një orë para se banorët kanë dëgjuar një shpërthim të madh. Zona më vonë u rrethua nga forcat e sigurisë për të parandaluar që dikush t’i afrohej zonës.
Shteti Islamik zgjodhi Kurejshët si udhëheqës të tij në nëntor 2022, pasi lideri i mëparshëm i IS-it u vra në një operacion në Sirinë jugore.
Sipas agjencisë shtetërore të lajmeve të Turqisë, Anadolu, Erdogan i tha transmetuesit turk TRT Turk se personi, i quajtur Abu Hussein al-Qurayshi, ishte “neutralizuar” në një operacion të kryer nga Organizata Kombëtare e Inteligjencës (MIT) të shtunën. Kjo do të thotë se ai ndoshta është vrarë ose kapur.
“Ne nuk mund të konfirmojmë, ashtu si Turqia nuk mund të konfirmojë identitetin e të vdekurit,” ka thënë për dpa, Farhad al-Shami, një zëdhënës i Forcave Demokratike (SDF), e cila po lufton së bashku me koalicionin e udhëhequr nga SHBA kundër pranisë së ISIS në Siri.
ISIS nuk është aspak afër fuqisë dhe ndikimit që kishte disa vite më parë
Shteti Islamik mori kontrollin e pjesëve të mëdha të Irakut dhe Sirisë në vitin 2014, dhe udhëheqësi i tij në atë kohë, Abu Bakr al-Baghdadi, shpalli një kalifat islamik në territorin ku jetonin miliona njerëz.
Por IS humbi kontrollin e territorit pas fushatave nga forcat siriane dhe irakiane të mbështetura nga SHBA, si dhe forcat siriane të mbështetura nga Irani, Rusia dhe paraushtarakë të ndryshëm.
Anëtarët e mbetur të IS janë fshehur kryesisht në zonat e largëta të të dy vendeve vitet e fundit, megjithëse ata janë ende të aftë të kryejnë sulme të papritura në shkallë të gjerë. Forcat amerikane u vendosën në Siri në vitin 2015 për të ndihmuar kurdët sirianë dhe aleatët e tyre të luftojnë Shtetin Islamik.
