Diplomatët më të lartë nga Kina dhe Shtetet e Bashkuara filluan bisedimet në Laos të shtunën, ndërsa dy fuqitë globale përpiqen të ruajnë linjat e komunikimit, pavarësisht nga rivaliteti i tyre i thelluar dhe tensionet rajonale në Azi.
Sekretari Amerikan i Shtetit Antony Blinken, ndodhet në Laos si pjesë e një vizite në Azi në sfondin e një fushate të ashpër zgjedhore presidenciale në ShBA, e cila ka rinovuar kontrollin rajonal mbi atë se si do të duket bota me një administratë të re në Shtëpinë e Bardhë.
Blinkeni po takohet me homologun e tij kinez, Ministrin e Jashtëm Wang Yi në margjinat e takimeve të ministrave të jashtëm të ASEAN-it në Laos – pjesa e parë e një udhëtimi njëjavor i cili përfshin gjithashtu ndalesa në Vietnam, Japoni, Filipine, Singapor dhe Mongoli.
Tensionet mes ShBA-së dhe Kinës kanë vazhduar muajt e fundit, edhe pse administrata e presidentit amerikan Joe Biden ka kërkuar të stabilizojë marrëdhëniet e vështira midis dy rivalëve globalë.
Pushtimi rus i Ukrainës, si dhe lëvizjet gjithnjë e më këmbëngulëse të Kinës në Detin e Kinës Jugore dhe kërcënimet ndaj Tajvanit, vitet e fundit kanë acaruar marrëdhëniet Washington-Pekin.
Në fillim të kësaj jave, Komanda e Mbrojtjes së Hapësirës Ajrore të Amerikës së Veriut detekoi dy avionë bombardues rusë dhe dy kinezë që fluturonin pranë Alaskës, në atë që një zyrtar amerikan i mbrojtjes tha se ishte hera e parë që të dy vendet u kapën ndërsa vepronin së bashku.
Mbështetja e vazhdueshme e Kinës për Rusinë më shumë se dy vjet pas pushtimit të Moskës ka qenë një pikë e vazhdueshme tensioni për ShBA-në, aleatët e saj dhe ukrainasit.
Kur liderët e NATO-s u takuan në fillim të këtij muaji, një deklaratë e përbashkët e quajti Pekinin një “mundësues vendimtar” të luftës së Rusisë kundër Ukrainës, duke përmendur se Kina jep “mbështetje në shkallë të gjerë për bazën industriale të mbrojtjes së Rusisë”.
SHBA-ja dhe Bashkimi Evropian në muajt e fundit kanë akuzuar Kinën për forcimin e sektorit të mbrojtjes së Rusisë me eksportin e mallrave me përdorim të dyfishtë dhe sanksionuan dhjetëra kompani në Hong Kong dhe Kinën kontinentale për shmangien e masave të gjera të vendosura ndaj Rusisë. Pekini ka mohuar furnizimin me armatim dhe pohon se mban kontrolle të rrepta për mallra të tilla.
Pekini ka kërkuar të pozicionohet si një ndërmjetës neutral i paqes në konflikt, pavarësisht thellimit të lidhjeve të tij politike, ekonomike dhe ushtarake me Moskën dhe miqësinë e ngushtë të liderit kinez Xi Jinping me presidentin rus Vladimir Putin.
