Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet, fenomen ky mjaft shqetësues. Cak i hajnave jo rrallëherë kanë qenë edhe zyrat e institucioneve shtetërore në vend. Një rast i tillë kishte ndodhur në Kuvendin Komunal në Ferizaj, para dy javësh.
Burimet nga Prokuroria kanë bërë me dije se Policia ka arritur të identifikojë personin e dyshuar për këtë rast, i cili është arrestuar gjatë ditës së djeshme dhe tashmë ndodhet nën masën e ndalimit policor.
Sinjali mëson se bëhet fjalë për A.B., i moshës 23-vjeçare, i cili më 4 mars, ka depërtuar brenda objektit të komunës përmes dritares dhe ka demoluar disa zyra, ku dyshohet se ka kryer vjedhje.
Rasti ishte denoncuar në Polici dhe si rezultat i ndërmarrjes së veprimeve hetimore, është zbuluar i riu që po dyshohet për këtë rast. Të hënën ai është shoqëruar në stacion policor, ku ka dhënë deklaratën e tij lidhur me veprën për të cilën po ngarkohet.
Me urdhër të Prokurorit të Shtetit, i dyshuari është dërguar në mbajtje për 48 orë dhe ndaj tij është iniciuar rasti si ‘Vjedhje’.
