BE-ja kërkon që shuma që Britania e Madhe duhet të paguajë për të dalë, të përcaktohet në euro, për t’u mbrojtur nga luhatjet e sterlinës britanike, sipas një dokumenti të Komisionit Evropian.
“Një tërheqje e udhëruar e BM-së nga Unioni kërkon që të përcaktohen detyrimet financiare që duhet të respektohen para tërheqjes”, shkruhet në këtë dokument të Komisionit.
“Këto detyrime duhet të përcaktohen në euro dhe pagimet mund të jenë objekt i një afati kohor të ndarë në disa vite”, thuhet në tekstin e publikuar sot nga “Politico.eu”.
Krerët e 27 vendeve anëtare duhet të miratojnë më 29 prill, gjatë një mbledhjeje në Bruksel, orientimet për negociatat me Londrën.
