Barcelona ka arritur që të regjistrojë një fitore shumë të rëndësishme në udhëtim ndaj Las Palmas, të arritur krejt në fund të ndeshjes.
Skuadra katalanase ka triumfuar me rezultat 2-1, duke përmbysur rezultatin ndaj skuadrës vendase.
Vendasit zhbllokuan të parët sfidën përmes sulmuesit Munir El Haddadi, i cili realizoi në minutën e 12-të dhe me këtë gol u vendos edhe 45 minutëshi i parë i këtij dueli.
Në pjesën e dytë, Barcelona mori iniciativën dhe barazoi shpejt shifrat, duke e arritur këtë përmes sulmuesit Ferran Torres, i cili shënoi në minutën e 56-të.
Përkundër përpjekjeve të vazhdueshme nga Barcelona për të shënuar të dytin, rrjeta vazhdonte të mbetej e paprekur, deri në kohën shtesë kur ndodhi ‘mrekullia’ për blaugranasit.
Një shtytje ndaj Ilkay Gundogan nga mbrojtësi i Las Palmas bëri që gjyqtari të vendosë për një 11-metërsh, dhe përgjegjësinë e mori pikërisht ai që e fitoi.
Mesfushori turko-gjerman u tregua tejet i saktë nga pika e bardhë, duke gjuajtur saktë në këndin e majtë të anës së tij, për të mposhtur portierin kundërshtar dhe fituar ndeshjen skuadrës së tij.
Barcelona rikthehet te fitorja pas dy ndeshjeve pa fitore, duke u ndodhur në pozitën e tretë në tabelë me 41 pikë, 7 më pak se dy kryesuesit e ligës, Real Madrid dhe Girona, të cilët ndajnë dy vendet e para me nga 48 pikë.
