Barcelona ka shënuar fitore ndaj Real Madridit në “El Clasicon” e cila u zhvillua në Las Vegas të Shteteve të Bashkuara të Amerikës.
Katalonasit triumfuan minimalisht 0:1 ndaj “Los Blancos”, në ndeshjen që filloi në orën pesë të mëngjesit me kohën tonë lokale.
Një shtyllë e goditur nga Valverde dhe një rast i mirë i çuar dëm nga Ansu Fati paraprakisht ishin tregues të mirë se goli nuk ishte larg.
Dhe, ai erdhi pak minuta më vonë, kur Raphinha realizoi nga distanca.
Njëherit ky ishte goli i dytë i tij me Barcelonën në ndeshjet parasezonale.
Më pas, ndeshja nuk prodhoi gola dhe katalonasit iu gëzuan fitores.
Në këtë takim për Barcelonën debutoi edhe Robert Lewandowski, i cili luajti në pjesën e parë, për t’u zëvendësuar pastaj nga Aubameyang.
Kjo ishte ndeshja e tretë miqësore për Barcelonën në parasezon, dy prej të cilave i ka fituar dhe një ka barazuar.
Në anën tjetër, për Real Madridin, kjo ishte miqësorja e parë në këtë fazë përgatitore.
