Avokati i Popullit: Shpërndarja e xhirimeve shkelje e ligjit

Avokati i Popullit Hilmi Jashari ka reaguar në lidhje me publikimin e pamjeve të kamerave të sigurisë nga burgu i Prizrenit ditën që vdiq Astrit Dehari.
“Mosrespektimi i dhimbjes së familjes Dehari, me deklarata kontradiktore nga zyrtarë të autoriteteve shtetërore, si dhe rrjedhja dhe zbulimi i xhirimeve nga Qendra e Paraburgimit në Prizren, në kohën kur ka ndodh vdekja e Astrit Deharit, paraqesin shkelje sipas Kodit Penal të Republikës së Kosovës, por gjithashtu janë shkelje të rënda të etikës profesionale”, thuhet në një komunikatë për media nga Avokati i Popullit.
Avokati i Popullit thuhet në komunikatë shpreh brengosjen për degradimin e procesit të hetimeve, përfshirë komentimin e detajuar të rrethanave lidhur me rastin, të cilat cenojnë rëndë dinjitetin dhe privatësinë e familjes në këtë fazë të vështirë për ta, që paraqesin bazën e të gjitha të drejtave dhe lirive themelore të njeriut.
“Avokati i Popullit tërheq vërejtjen se autoritetet publike duhet të jenë të përgjegjshme përballë detyrimeve dhe përgjegjësive që kanë, në një proces hetimor dhe jo të shndërrohen në debatues dhe komentues ordiner, me faktet dhe provat e një rasti nën hetime, jashtëzakonisht të ndjeshëm dhe kompleks”, thuhet në komunikatën e Avokatit të Popullit