Protestat në tri komunat veriore, Leposaviq, Zubin Potok dhe Zveçan, janë duke e vazhduar edhe sot.
Para objekteve komunale në të tri komunat janë mbledhur qytetarë të komunitetit serbë, derisa objektet komunale po sigurohen nga KFOR.
Gazetarja e T7, Arianitë Zhegrova, po qëndron në Leposaviq, prej ku ka dërguar pamje ku shihen automjete të shumta të KFOR’it në këtë komunë.
Ndryshe, Policia e Kosovës ka njoftuar për gjendjen aktuale në veri.
Sipas Policisë, “situata aktualisht vlerësohet të jetë e brishtë, por e qetë”, raporton Express.
Policia ka thënë se po vazhdon me angazhime në ofrimin e sigurisë dhe mbarëvajtjen e protestave, si dhe po bashkëpunon/koordinon aktivitetet me KFOR-in dhe institucionet relevante.
Lidhur me rastet e djeshme, Policia ka thënë se njësitet policore janë duke ndërmarrë të gjitha veprimet hetimore.
“Policia e Kosovës, sipas detyrës zyrtare, po vazhdon me angazhime në ofrimin e sigurisë dhe mbarëvajtjen e protestave, si dhe po bashkëpunon/koordinon aktivitetet me KFOR-in dhe institucionet relevante. Njëkohësisht njësitet policore janë duke ndërmarrë të gjitha veprimet hetimore lidhur me rastet dhe zhvillimet e djeshme. Policia e Kosovës edhe sot fton qytetarët për qetësi dhe të mos bien pre e thirrjeve për protestë të dhunshme dhe provokime të çfarëdo natyre qofshin ato”, thuhet në njoftim.
