Arrin në Prishtinë dërgesa e tretë e UNICEF-it me furnizime kundër COVID-19

Dërgesa përmban 8.960 mantele kirurgjike, 2.680 maska FFP2 / N95 dhe 33.600 maska kirurgjike si ndihmë nga Qeveria e Luksemburgut.

Ministri në detyrë i Shëndetësisë Arben Vitia, ka mirëpritur kontributin e partnerëve në luftën e përbashkët kundër Covid-19, ndërsa pajisjet mbrojtëse profesionale do t’i ndihmojnë personelit shëndetësor që me një siguri sa më të lartë të luftojnë në parandalimin dhe luftimin e kësaj sëmundje.

Shefja e Misionit të Ambasadës së Luksemburgut, Natacha Gomes, tha se si partner kryesor në sektorin e shëndetësisë në Kosovë, është vendimtare që vendi i saj ta mbështesë Kosovën në luftën kundër COVID-19.

“Kjo është vetëm njëra prej ndërhyrjeve të planifikuara dhe jemi krenarë që po punojmë me partnerin tonë të besueshëm UNICEF-in për të arritur tek ata që përndryshe nuk do të mund të kishin qasje në furnizime dhe shërbime që shpëtojnë jetë”, tha Gomes.

Shefi i zyrës së UNICEF-it, Murat Sahin tha se do të vazhdojnë t’i mbështesin institucionet dhe komunitetet në tërë Kosovën për t’i tejkaluar sfidat e dala si pasojë e COVID-19.

Ndryshe, deri më tash UNICEF-i ka ofruar 36.200 dorëza, 68.544 maska kirurgjike, 5.380 maska FFP2/N95, 1.000 kominoshe për mbrojtje, 51.460 mantele kirurgjike dhe 2.934 përparëse mbrojtëse, 81 termometra klinikë me rreze infra të kuqe, të gjitha këto në mbështetje të reagimit ndaj pandemisë në Kosovë.

PostAdss