Armenia nuk e ka njohur pavarësinë e Kosovës por ka bërë hapa në drejtim të bashkëpunimit në mes të dy vendeve.
Njoftimi vjen nga Ministria e Jashtme e Armenisë, pas takimit të Ministrit Zohrab Mnatsakanyan me Ministrin e Jashtëm kosovar Behgjet Pacolli në Nju Jork, në kuadër të punimeve të Asamblesë së Përgjithshme të Kombeve të Bashkuara.
“Armenia nuk e ka njohur formalisht Kosovën, por takimet e tilla japin mundësinë e njohjes së qasjeve të dy vendeve nga dora e parë dhe shkëmbimin e pikëpamjeve për çështjet e interesit të përbashkët”, citojnë mediat armene Ministrin Mnatsakanyan.
Për takimin njoftoi edhe Pacolli nëpërmjet rrjeteve sociale.
Sipas tij, Armenia dhe Kosova kanë mundësinë e bashkëpunimit në fushën e ekonomisë dhe tregtisë.
Ai la të hapur mundësinë e një vizite në Armeni.
