Analisti Ylli Hoxha ka kërkuar dorëheqjen e ministres së Drejtësisë, Albulena Haxhiu.
“Dorëheqje, sillni një ministër, një ekip, i cili është profesionalisht tejet i ngritur, në të cilin debati me Blerim Isufajn nuk do të ekzistonte sepse ambicia do të ishte më e lartë. Pra nuk kemi ambicie me sjellë një prokuror për qejfi të Albin Kurtit, duhet me sjellë një prokuror që kryen punë”, ka thënë Hoxha në “Debat Plus“.
Hoxha ka thënë se sistemi i drejtësisë duhet të jetë i pavarur dhe efikas dhe cilësorë.
“Nëse ti e ke shkruar ligjin për KPK-në dhe i ke marrë dy opinione të Venecias duke t’i theksuar disa të meta serioze”, ka thënë ai duke shtuar se kryeministri Kurti ka dhënë “shenja të qarta” se e ka qëllim të kontrollojë sistemin e drejtësisë.
“Kjo nuk është reforma për të cilat i ka marrë votat Albin Kurti. Albin Kurti nuk është votuar nga qytetarët e Kosovës për me kap sistemin prokurorial, as gjyqësor, e asnjërin prej tyre”, ka deklaruar Hoxha.
Hoxha është shprehur se duhet të bëhen reforma në Këshillin Prokurorial të Kosovës (KPK) dhe në Këshillin Gjyqësor të Kosovës (KGjK).
