Në kuadër të forcimit të marrëdhënieve dypalëshe me institucionet e Belgjikës, Ambasadori i Kosovës në këtë vend, Bernard Nikaj, ka takuar Senatorin Pol Van Den Driessche, anëtar i Senatit belg dhe Grupit të Miqësisë Belgjikë – Kosovë.
Në takim, senatori Van Den Driessche u informua për zhvillimet e fundit në Kosovë, bashkëpunimin mes dy shteteve tona, dhe arritjet e Republikës së Kosovës në relacion me NATO-n dhe Bashkimin Evropian, ka bërë të ditur Ambasada e Kosovës në Bruksel.
Senatori Van Den Driessche ka shprehur kënaqësinë për përparimin e Kosovës në relacion me BE-në dhe zhvillimin ekonomik, ka njoftuar Ambasada.
“Ambasadori Nikaj dhe Senatori Van Den Driessche shprehën interesimin për rritjen e bashkëpunimit ndërparlamentar përmes shkëmbimit të vizitave mes grupeve të miqësisë si dhe mbajtjen e takimeve gjatë vizitave të delegacioneve të Kosovës në Bruksel”, thuhet në njoftim.
