“Shtetet e Bashkuara të Amerikës dhe Bashkimi Evropian janë duke punuar ngushtë për të garantuar stabilitetin në Kosovë”. Kështu po thekson ambasadori i BE-së në Kosovë, Tomas Szunyog, sipas të cilit dialogu mes Kosovës dhe Serbisë po zhvillohet me një synim, për arritjen e një marrëveshje gjithëpërfshirëse dhe për mbylljen e çështjeve të hapura mes të dyja vendeve. Veç tjerash, ai konsideron se Kosova ka të ardhme evropiane, por që rruga nuk është e lehtë.
Për ambasadorin e BE-së në Kosovë sfida më e madhe për vendin, është implementimi i legjislacionit, derisa shtoi se varësisht nga performanca e një vendi, varen edhe marrjet e fondeve.
Ai në një diskutim me studentët e Fakultetit Juridik, ka folur edhe për marrëveshjen e nënshkruar mes Kosovës dhe Serbisë në Uashington. Ndër tjera, shtoi se brenda institucioneve të Kosovës ka mungesë të koordinimit të punëve evropiane.
“Ka dialog që jo vetëm që po lehtësohet nga Bashkimi Evropian, por është mandatuar edhe nga Asambleja e Përgjithshme e OKB-së. Dhe ato zotime të njëanshme, kisha me thënë disa prej tyre janë pozitive edhe mund të jenë në dobi të dialogut, në disa mënyra. Por, janë disa të cilat nuk lidhen me dialogun apo me marrëdhëniet Kosovë-Serbi, apo Kosovë-BE. Ka elemente pozitive dhe elemente të tjera. BE dhe ShBA po punojnë shumë ngushtë për të garantuar stabilitetin dhe prosperitetin e Kosovës dhe tërë regjionit”, ka deklaruar ai.
Shefi i BE-së thekson se synimi i dialogut në Bruksel është arritja e një marrëveshje gjithëpërfshirëse e cila do të normalizonte marrëdhëniet mes dy shteteve.
“Dialogu zhvillohet me synimin për të arritur një marrëveshje gjithëpërfshirëse, detyruese për normalizimin e marrëdhënieve. Dhe kjo marrëveshje duhet të mbyll të gjitha çështjet e hapura ekzistuese mes Kosovës dhe Serbisë”, ka deklaruar ai, njofton KP.
Kështu ka theksuar ai në diskutimin me studentët e Fakultetit Juridik në kuadër të “Guest Speaker Program” me temën “Rruga Evropiane e Kosovës dhe Kushtëzimi për Zgjerimin: Çfarë duhet të bëjë Kosova për t’i ndjekur reformat shpejt dhe më seriozisht?”.
Ambasadori i BE-së, Tomas Szunyog ka theksuar edhe të gjeturat e Raportit për Kosovën nga Komisioni Evropian. Ai ka theksuar ka pasur progres të kufizuar në luftimin e korrupsionit dhe krimit të organizuar.
“Sfida më e madhe këtu në Kosovë është implementimi i legjislacionit. Sepse legjislacioni zakonisht në shumicën e rasteve është modern, relativisht i ri, është i ngjashëm me standardet e BE-së. Nuk është problemi legjislacioni, ka disa boshllëqe, disa ligje mungojnë, por sfida kryesore është implementimi i legjislacionit dhe ndjekja e legjislacionit. Dhe ka boshllëqe domethënëse”, ka shtuar ai.
E si shkak i përhapjes së pandemisë COVID-19, ai tha se ka pasur edhe vonesa në procedura penale, e që Kodi i Procedurës Penale specifikon se nëse nuk ka seancë për tre muaj, gjykimi duhet të rifillojë.
“Gjetja kryesore në Raportin për Kosovën ka filluar me një deklaratë të thjeshtë që nuk ka rrugë të shkurtër, nuk ka me i ra shkurtër rrugës drejt Evropës. Ka mangësi në Kosovë, duhet të bëhet reforma në sundimin e ligjit, me implementim në mënyrë të ashpër dhe me rezultate. Dhe këto rezultate nuk janë për Brukselin, sepse gjyqësori efektiv, luftimi kundër korrupsionit dhe ekonomia më e fortë e shtetit i shërben Kosovës dhe qytetarëve të Kosovës. Në përgjithësi Komisioni Evropian ka deklaruar se ka progres të kufizuar, periudha me turbulenca politike. Me zgjedhje të hershme, dy herë ndryshoj qeveria, pastaj kemi pasur periudha shumë të gjata të qeverive në detyrë. Pastaj bllokimi si rezultat i COVID-it ka pasur efekt negativ edhe vendi nuk është përmirësuar si formë e përfaqësimit politik”, u shpreh ai.
Ai u shpreh kritik për gjendjen e arsimit, që sipas tij dëshmohet edhe me rezultatet e fundit të PISA-s. Ambasadori i BE-së në Kosovë shtoi se nga mosha 18 deri 30 vjeçare, 40 për qind e të rinjve janë të papunë, e që sipas tij faktori kryesor është arsimi i dobët.
Ndërsa, dekani i Fakultetit Juridik, Avni Puka tha se nga qytetarët rruga integruese po shihet si sfidë. Theksoi se pret nga studentët që të japin kontributin e tyre pa kompromis, pa amnistuar asnjë dukuri për të luftuar korrupsionin e nepotizmin.
