Deputetja nga radhët e Partisë Demokratikë të Kosovës, Ganimete Musliu ka thënë se ka informacione që grupi kriminal “Mjekroshat” është futur nga Serbia në Kosovë dhe është duke vepruar në veri të vendit.
Këtë alarm, ajo e ngriti në seancën e Kuvendit të Kosovës, ndërsa për Gazetën inFokus ka dhënë detaje për informacionet që ka në lidhje me këtë rast.
“Po siç e thashë, grupi kriminal ‘Mjekrroshat’ kanë hyrë dhe po veprojnë në veri të vendit. Institucionet e shtetit janë në dijeni për këtë çështje dhe me intereson të di nëse kanë marrë ndonjë veprim për dëbimin e tyre prej Kosovës. Dyshohet që kanë ardhur përmes rrugëve ilegale”, ka thënë Musliu.
Derisa deputetja e PDK-së, ka thënë se në dy seanca ka pritur që t’i bëjë pyetje ministrit të Punëve të Brendshme, Xhelal Sveçla, se a është marrë ndonjë veprim kundër këtij grupi, mirëpo ai nuk është paraqitur në seanca.
“Është ky shqetësim që unë e kam ngrit edhe në seancën e kaluar. Nuk ka ardhur zotëri Sveçla. S’ka ardhur as sot, por duke pas parasysh që Kuvendi mund të shkojë në pushim sezonal mendova që është më mirë me e adresu publikisht që të paktën mediet të merren me këtë çështje”, ka thënë Musliu.
Kujtojmë se ky grup kriminal është i përmendur edhe në aktakuzën e Prokurorisë Speciale, rreth vrasjes së Oliver Ivanoviqit.
Pos kësaj ky grup kriminal nën urdhërat e Milan Radojçiqit, dyshohet se ka sulmuar me bombë shtëpinë e Dragan Jabllanoviqit në Leposaviq.
Ndërsa, po ashtu kanë gjuajtur me armë në zyrat e partisë së Aleksandar Jabllanoviqit./Gazeta inFokus/
