LDK’ja pas mbledhjes së Kryesisë të mbajtur sot, zgjodhi që kompetencat e tij në Podujevë, t’ia bartë kandidatit për kryetar të komunës, Ekrem Hysenit. Kreu i LDK-së, Lumir Abdixhiku ka thënë se kryetari i deritanishëm i degës në Podujevë, Agim Veliu nuk ka shprehur interesim për të rikandiduar. Por, këto deklarata të Abdxhikut po i hedhë poshtë vet Agim Veliu. Ky i fundit ka thënë se është kundër këtij vendimi dhe se marrëveshja është bërë pa pëlqimin e tij.
Veliu është shprehur se në LDK sot kanë marrë një vendim ilegal.
“Është ba një marrëveshje pa pëlqim. Kemi qenë duke diskutuar me e ba një marrëveshje të madhe e m’i tejkalu të gjitha. Ata sot paskan marrë vendim ilegal, ilegjitim për mua. Është në kundërshtim me statutin e LDK-së. Nuk ka të drejtë askush pa proces me e ndryshu kryetari, me zgjedh, shkarku ose me e ngarku. Për këtë punë Kuvendi është”, ka thënë Veliu.
Tutje, Veliu ka thënë se në asnjë rrethanë nuk do të pajtohet me një vendim të tillë.
“Në këtë rast Kryesia ka marrë vendim kundër statutit. Nuk ka të drejtë për këtë vendim. Ky është vendim që është marrë pa koordinimin e strukturave të LDK-së. Ky është një vendim ilegal për mua. Jolegjitim.”, thotë Veliu për IndeksOnline.
E të gjitha kompetencat e degës së LDK-së në Podujevë i kanë kaluar kandidatit të kësaj partie për kryetar të kësaj komune, Ekrem Hysenit.
Kjo është konfirmuar nga kryetari i Lidhjes Demokratike të Kosovës, Lumir Abdixhiku, i cili ka thënë se ky ka qenë vendim i kryesisë, pas mbledhjes që filloi në orën 18:00.
“Me vendim të kryesisë, kandidati për kryetar të Podujevës nga LDK është Ekrem Hyseni. Kryesia e LDK-së i ka kaluar të gjitha kompetencat e degës dhe shtabit zgjedhor dhe të garës në Podujevë. Vendime të njëjta do të jenë pothuajse në secilën komunë. Kjo me qëllim të reformimit edhe të degëve. Kompetencat i kanë kaluar kandidatit për kryetar të Komunës së Podujevës, nuk ka të bëjë me individ”, ka thënë ai.
