Deputeti i Lëvizjes Vetëvendosje Armend Muja ka komentuar abstenimin e deputëtëve Eman Rrahmani dhe Visar Korenica lidhur me propozimin e Qeverisë për shkarkimin e anëtarës së OSHP-së Kimete Gashi.
Muja në një prononcim për Paparacin, ka thënë se abstenimin i dy kolegëve të tij nuk ka qenë votë kundër Qeverisë.
Ai këtë e ka arsyetuar duke thënë se deputetët kanë kërkuar që në shkarkim të përfshihen i gjithë Bordi i OSHP-së.
“Disa deputetë kanë kërkuar që në listën për shkarkim të përfshihen të gjithë, përfshirë edhe deputetin Rrahmani. Vota e rezervuar e tyre u justifikua në këtë mënyrë e jo se ishte kundër propozimit të Qeverisë domosdoshmërisht. Megjithatë, propozimet dhe përgjegjësia është individuale në Bord, sipas Gjykatës Kushtetuese”.
Por menjëherë pas përfundimit të mbledhjes së Komisionit, dhe pasi nisi seanca e Kuvendit të Kosovës, Muja shkoi afër deputetit Rrahmani për të biseduar.
Megjithatë, Muja ka mohuar se ka biseduar me Rrahmanin lidhur me abstenimin e tij në Komisionin për Buxhet dhe Financa.
“Së dyti diskutimet në Sallën e Kuvendit me z Rrahmani nuk lidheshin me këtë temë”, ka thënë Muja për Paparacin.
Megjithatë, propozim-vendimi i Kurtit ka ngecur në komision. Aty është ‘rrëzuar’ nga deputetët e tij të Lëvizjes Vetëvendosje, të cilët kanë abstenuar në shqyrtimin e propozimit në mbledhjen e komisionit të hënën.
Abstenimet e Eman Rrahmanit dhe Visar Korenicës kanë rezultuar në dështimin e kësaj pike. /Paparaci.com
