Kandidati për deputet, Abdullah Klinaku, ka prezantuar një plan ambicioz për përmirësimin e kushteve të jetesës për familjet kosovare, i cili do të implementohet nga Ministria për Familje, shkruan PrishtinaPress.
Ky projekt, i njohur si “Pakoja për Mirëqenien e Familjes”, synon fuqizimin e familjeve dhe mbështetje të gjerë për individët dhe grupe të ndryshme shoqërore.
Kjo pako, që do të aprovohet nga Qeveria e Kosovës, do të ofrojë mbështetje për disa segmente kyçe të shoqërisë, duke përfshirë:
- Shtesa financiare për fëmijët dhe lehonat
- Përkujdesje për personat e moshuar dhe ata me nevoja speciale
- Mbështetje për çiftet e sapo martuara për sigurimin e banimit
- Paketë mbështetjeje financiare për ata që mbesin pa punë deri në gjashtë muaj
- Sigurim shëndetësor dhe shtesa financiare për fëmijë deri në moshën 16 vjeçare
Gjithashtu, kjo pako përfshin:
- Mbështetje për gratë e papunësuara me 3 fëmijë e më shumë, duke ofruar një mbështetje financiare për deri 10 vjet.
- Subvencione për lindjen e fëmijëve, duke ofruar shpërblime financiare që variojnë nga 1500 deri në 3500 euro për lindjet e para, të dyta dhe të treta.
- Zgjerim të pushimit të lehonisë dhe pushimit mjekësor për sëmundje të rënda për punonjësit.
Një tjetër nismë e rëndësishme është subvencionimi i themelimit të bizneseve të profesioneve të lira, duke përfshirë mbështetje për qiratë dhe rregullimin e zyrave.
Kandidati Klinaku e ka theksuar se kjo pako kërkon angazhimin e shumë ministrive dhe një buxhet të madh, por synimi është që të rritet mirëqenia e familjeve dhe, për pasojë, edhe e gjithë shoqërisë kosovare. Kjo nismë është një hap i rëndësishëm drejt një të ardhmeje më të mirë për qytetarët e Kosovës.
