Kryetari i LDK-së, Lumir Abdixhiku deklaroi sot se BE duhet të aplikojë standarde të njëjta për Ballkanin Perëndimor duke liberalizuar vizat për Kosovën.
Ai këto komente i bëri në një video-konferencë në Samitin e Partive Popullore Evropiane (PPE) për Ballkanin Perëndimor që u mbajt sot në Lubjanë.
Sipas një njoftimi të LDK-së, kryetari Abdixhiku në këtë takim po ashtu kërkoi që pesë vendet tjera të BE-së ta njohin Republikën e Kosovës si dhe të hapin rrugën e shtetit tonë drejt Bashkimit Evropian.
Ndryshe, në këtë samit morën pjesë edhe presidenti i PPE, Donald Tusk, presidentja e Komisionit Evropian, Ursula von der Leyen, kryeministri i Sllovenisë, Janez Jansha, kancelari i Austrisë, Sebastian Kurz etj.
Samiti i Partive Popullore Evropian PPE u mbajt në vigjilje të Samitit të BE-së që mbahet nesër në Slloveni.
