Ambasadori britanik Kosovë, Nicholas Abbott, ka reaguar pak para nisjes të takimeve në Ohër të Maqedonisë së Veriut.
Sipas Abbott, një rezultat pozitiv nga këto takime mund të arrihet nëse ka vullnet politik, kurajo dhe pragmatizëm nga kryeministri i Kosovës, Albin Kurti dhe presidenti i Serbisë, Aleksandër Vuçiq.
Ai ka thënë se Mbretëria e Bashkuar është e gatshme të ndihmojë në implementim.
“Një rezultat pozitiv nga bisedimet për normalizim në Ohër mund të ndodh me vullnet politik, kurajo dhe pragmatizëm nga Albin Kurti dhe Aleksander Vucic. Do të përfitojnë qytetarët dhe komunitetet. Mbretëria e Bashkuar mbështet ndërmjetësit everopian dhe qëndron gati të ndihmojë implementimin”, ka shkruar Abbott në Facebook.
Fillimisht Kurti do të zhvillojë takim me Shefin e diplomacisë së Bashkimit Evropian, Josep Borrell dhe të dërguarin e posaçëm i BE-së për dialogun Kosovë-Serbi, Mirosllav Lajçak. Më pas, do të pësojë takimi i përbashkët me ndërmjetësuesit dhe Vuçiqin.
Borrell deklaroi dje se ka pranuar komentet e palëve në lidhje me aneksin e zbatimit të propozimit të BE-së për normalizimin e marrëdhënieve.
“Shpresoj se Kosova dhe Serbia do të mund të bien dakord për rezultatin përfundimtar të këtyre bisedimeve”, tha Borrell më 17 mars, pas një takimi që zhvilloi me presidentin e Maqedonisë së Veriut në Shkup.
Në tryezë të diskutimeve gjendet aneksi i zbatimit të një propozimi të BE-së për normalizimin e marrëdhënieve Kosovë-Serbi.
Kurti dhe Vuçiq e kanë pranuar në parim propozimin e BE-së për normalizimin e marrëdhënieve, gjatë një takimi në Bruksel, më 27 shkurt.
Propozimi i BE-së nuk e obligon Serbinë që ta njohë Kosovën, por kërkon nga të dyja vendet që t’i njohin dokumentet e njëra-tjetrës, si: pasaportat, diplomat dhe targat e makinave. Po ashtu, kërkon nga të dyja vendet që t’i zbatojnë të gjitha marrëveshjet e arritura në dialog, si dhe të mos e pengojnë njëra-tjetrën në proceset integruese.
SHBA-ja e ka mbështetur propozimin e BE-së, i cili më herët është njohur edhe si plani franko-gjerman.
