Ish-zv.kryeministri dhe deputeti i Lëvizjes Vetëvendosje, Haki Abazi ka reaguar ashpër ndaj kryeministrit Albin Kurti për marrëveshjen e arritur mes Kosovës dhe Serbisë mbrëmë mbi Aneksin në Ohër.
Në profilin e tij në Facebook, Abazi i ka shtruar një varg pyetjesh Kurtit, përfshirë edhe Nenin 7.
“Pse urgjenca për zbatim të pikës 7-vetëm?” – pyeti Abazi.
Tutje, Abazi pyeti kreun e ekzekutivit se “a ka të drejtë FSK të paraqitet në komunat veriore të vendit?”.
Po ashtu, deputeti la të nënkuptohen se “mund të paraqiten bombolat e gazit lotsjellës në parlamentin e Kosovës”.
Reagimi i plotë i Abazit:
Pyetje që sillen vërdallë para se të paraqiten bombolat e gazit lotsjellës në parlamentin e Kosovës:
Kush e propozoi Ohrin dhe pse nuk është propozuar Prespa?
Pse jo Selaniku apo Vjena?
Pse nuk ishte Rama në takim?
A do të mbahen zgjedhjet e lira e demokratike në katër komunat e veriut të Kosovës, kur?
Çfarë do të ndodhë nëse njësia speciale shkon në Veri të Kosovës, a do të ketë barrikada të Veselinovicit, Radojcicit dhe Rakicit?
A ka të drejtë FSK të paraqitet në Komunat Veriore të vendit tonë?
Pse urgjenca për zbatim të pikës 7- vetëm?
A do të vetmenagjojnë komunat Serbe nëpërmejt strukturave të tyre “Komunat paralele” që sot menagjojnë apo ato do të shuhen dhe do të krijohen të reja?
Përmendja e të zhdukurve nuk është ballafaqim me të kaluarën, as lejimi i kthimit të mbetjeve mortore, nuk është ballafaqim me të kaluarën ne fakt është tentim për të tejkaluar të kaluarën.
